Mańǵystaýda kún 46 gradýsqa deıin ysydy
AQTAÝ. QazAqparat - Mańǵystaýda 30 maýsymnan beri kún ystyq bolyp tur. Qazir óńirdiń keı jerlerinde synap baǵanasy 46 gradýsqa deıin kóterilgen. Al, topyraq betindegi temperatýra 52 gradýs, dep habarlaıdy Qazaqparat tilshisi.
Sınoptıkterdiń aıtýynsha, óńirde temperatýranyń kúrt kóterilýi keń aýqymdy antıtsıklonnyń yqpalyna baılanysty.
Ystyq tek apta sońyna qaraı basylady. Qazir qala mańyndaǵy jaǵajaılarda ıne shanshar oryn joq. Turǵyndar aptap ystyqtan sýǵa shomylyp qorǵanyp júr.
Aıta keteıik, byltyr da osyndaı aýa raıy bolǵan. Ásirese, oblys mańynan alys jatqan aýdandarda eń joǵarǵy temperatýra tirkelip otyr.
«1 shilde kúni Qaraqııa aýdany +45+46 gradýs, Mańǵystaý +44,+45 gradýs tirkeldi. Atalǵan qubylysqa qatysty aptap ystyq bolatyny jóninde sınoptıkter aldyn ala eskertti. Bul ystyq aldaǵy ýaqytta saqtalady. 3 shilde kúni +37+42, keı jerlerde +46 gradýs, al, 4 shilde azdaǵan tómendeý bolady, +34,+39 shamasynda. Keı jerlerde +43 gradýsqa bolady dep kútiledi», - deıdi Qazgıdromettiń óńirlik fılıalynyń jetekshi ınjener-sınoptıgi Dınara Іlıasova.
