Mańǵystaýda qudyqqa qulaǵan 2 bala aman qaldy
Abyroı bolǵanda eki búldirshindi de dárigerler aman alyp qaldy.
MO densaýlyq saqtaý basqarmasy baspasóz qyzmetiniń habarlaýynsha, 1 jasar sábı keshe saǵat 16:20-da oblystyq balalar aýrýhanasynyń jansaqtaý bólimine aýyr halde jetkizilgen.
«2018 jyly týǵan sábı «sýǵa tunshyǵý» dıagnozy boıynsha tústi. Ata-anasynyń aıtýynsha, bala Saıyn Shapaǵatov aýylynda ornalasqan úıdiń aýlasyndaǵy sý toly qudyqqa qulap ketken»,-delingen habarlamada.
Al, ekinshi osyǵan uqsas oqıǵa Munaıly aýdanynda bolǵan. Oblystyq balalar aýrýhanasynyń qabyldaý bólimine aýyr halde jetkizilgen búldirshin 2016 jyly týǵan.
«Oǵan da «sýǵa tunshyǵý» dıagnozy qoıylǵan. Dárigerler dereý jansaqtaý bólimine alyp ketti. Bala 1 kún boıy es-tússiz jatty. Qazir jaǵdaıy turaqtalǵan. Ata-anasy balany qudyqtyń ishinen taýyp alǵan. Qansha ýaqyt onda jatqanyn bilmeıdi»,-deıdi baspasóz qyzmeti.