Mańǵystaýda qoıdy qynadaı qyrǵan 35 ıt atyldy

AQTAÝ. QazAqparat - Mańǵystaý oblysy Saıyn Shapaǵatov aýylynda qańǵybas ıtter malǵa shabýyl jasaýda. Olar nebári eki-úsh kúnniń ishinde eldi mekendegi 4 úıdiń 22 bas malyn tamaqtap ketken.

Aýyl ákiminiń tapsyrmasymen ıtterdi aýlaýǵa mamandar kirisken bolatyn. Osy ýaqytqa deıin 35 ıt atylypty. Saıyn Shapaǵatov aýyly ákimdiginiń bas mamany Erkebulan Jánibektiń aıtýynsha, atylǵan ıtter tekserilgen. Birinshi belgileri men mal dárigeriniń sıpattamasy boıynsha olar qutyrý aýrýyna shaldyqpaǵan. Tek ashtyqtan osylaı qoradaǵy malǵa shabýyldaǵan degen boljam bar.

Saıyn Shapaǵatov pen Aqshuqyr aýylynda jylyna 2 ret 1000-1500 ıt atylady. Sondyqtan bul másele ózekti. Bıyl 2000-ǵa jýyǵy atylǵan. Túpqaraǵan aýdany boıynsha jyl saıyn 3-4 mıllıon teńge bólinedi.  Bıyl bul qarjy kóbeımek. Sonda da qańǵyǵan ıtter azaımaı tur.

Qazir turǵyndardyń jalpy shyǵyndary eseptelip jatyr. Іstiń mán-jaıy anyqtalǵan soń olarǵa ótemaqy qarastyrylýy múmkin. 


Basty foto: feo.rf