Mańǵystaýda koronavırýs juqtyrǵandar qatary kóbeıgen
Bul týraly Mańǵystaý oblysynyń qoǵamdyq kommýnıkatsııa ortalyǵynda ótken brıfıngide oblystyń bas sanıtar dárigeri Ǵazız Nadýev málim etti.
Onyń aıtýynsha, jergilikti turǵyndardyń jasyryn úılený toıyn jasaýy, karantın shekteýine qaramastan otbasylyq mereıtoılar men eske alý, as sııaqty sharalardy ótkizýi qaýipti indetti juqtyrǵandardyń tirkelýine sebep bolǵan. Sondyqtan jergilikti bılik pen jaýapty organdar meıramhanalar men toıhanalarǵa ótkiziletin reıd sharalaryn kúsheıtpek.
«17 tamyzynan bastap 23 monıtorıng toby jumys istedi. Osy aralyqta 1 900 nysan jumysyn jańǵyrtty, barlyǵy 294 nysanǵa tekserý júrgizildi. Al, 17 tamyz ben 7 qazan aralyǵynda Aqtaýda - 55, Jańaózende - 61, Munaılyda - 66, Beıneýde - 30, Qaraqııada – 20 reıd júrgizilgen. Mańǵystaý aýdanynda - 62 reıd júrgizildi. 6 shildeden beri 130 aıyppul salyndy, somasy 14 931 750 teńge Onyń ishinde 17-si karantın rejımin buzý, 12-is otbasylyq shar uıymdastyrý, 70-i maska rejımin, 31-i dezınfektsııa rejımi buzýǵa qatysty», - dedi Ǵazız Nadýev.
Karantın rejımi bastalǵaly polıtsııa basqarmasynyń qyzmetkerleri de mobıldi toptyń múshelerimen birlesip reıd júrgizdi. Qaýipsizdik talabyna qulaq aspaı, belgilengen ýaqyttan keıin jumys ýaqytyn toqtatpaǵan nysandarǵa aıyppul salyndy.
«Kafe, meıramhana, monshalar, shashtarazdar, jabyq ǵımaratta ornalasqan obektiler tekserildi. Nátıjesinde 894 zań buzýshylyq anyqtaldy. Onyń ishinde birlesken mobıldi toptarmen – 239 quqyq buzýshylyq, Іshki ister organdary qyzmetkerlerimen – 655 quqyq buzýshylyq anyqtalyp, 130 tulǵaǵa ákimshilik aıyppul salyndy. Sondaı-aq, shekteý sharalaryna qaramastan merekelik jáne sadaqa is-sharalaryn ótkizgeni úshin 13 ákimshilik quqyq buzýshylyq anyqtalyp, ákimshilik aıyppul salyndy», -dedi Mańǵystaý oblystyq PD jergilikti polıtsııa qyzmeti basqarmasy basshysynyń mindetin atqarýshy Qaldymurat Aıǵaraqov.
Esterińizge sala keteıik, Mańǵystaý oblysynda COVID-19 – 3349 adamnan anyqtalǵan, onyń ishinde saýyqqandar – 3267.