Mańǵystaýda kópbeıindi balalar aýrýhanasynyń juqpaly aýrýlar bólimi jóndeýden ótedi
Bul týraly medıtsınalyq mekemeniń bas dárigeri Amanbek Jýmırov habarlady. Aıtýynsha, qazir qarajat bóliný ústinde. Osyǵan deıin almatylyq naýqastyń shaǵymy jelini dúr silkindirgen bolatyn. Ol «aýrýhana ashanasynda barlyq naýqastarǵa arnalǵan bir ǵana qazan bar jáne tamaqty jylytatyn qysqa tolqyndy pesh joq»,-dep jarııalaǵan bolatyn. Qazir jaǵdaı túzeldi me? Emdelýshiler ne deıdi?
Osy ýaqytqa deıin turǵyndardyń arasynda «juqpaly aýrýlar bólimi sanıtarlyq talapqa saı emes», «gıgıenalyq jaǵdaıy syn kótermeıdi», «qabyrǵany zeń basqan» degen pikirler jeldeı esip, túrli vıdeolar taraǵan bolatyn. Kúnine 10 naýqasqa deıin kelip túsetin medıtsınalyq mekeme tarapyna aıtylǵan synnyń keıbirin bas dáriger de rastap otyr. Aıtýynsha, aýrýhanada naýqastardy jatqyzatyn kereýet jetkiliksiz. Sondyqtan keı jaǵdaıda dálizge jatqyzýǵa májbúr bolatyn kezder bolady.
«Kelgen aýrýdy keri qaıtara almaımyz. Em kórsetýimiz kerek. Sondaı jaǵdaıdyń oryn alatyny ras. Bul kúrdeli másele. 60 kerýetti oryn oblysqa az. Bul mekeme 1981 jyly salynǵan. Burynǵy kez ben qazirgini salystyra almaımyz. Munaıly aýdanynda bólimshe joq bolǵandyqtan naýqastar sany artýda. Osy ýaqytqa deıin biraz jumys jasaldy. Ákimshilikten osy ýaqytqa deıin otyrǵysh, tósek, kereýetter alyndy. Dári-dármek jetkilikti»,-deıdi «MO Kópbeıindi balalar aýrýhanasy» ShJQ MKK Dırektory Amanbek Jýmırov.
«Buryn juqpaly aýrýlar aýrýhanasy bolǵan. Osy jyldyń qańtar aıynan bastap, oblystyq balalar aýrýhanasyna qarasty bólimshe bolyp qaldy. Munda 60 orynǵa shaqtalǵan. Biraq, qosymsha aldyrdyq. Maýsymdyq aýrýlar artýynan naýqastar sany da artqan. Máselen, barlyq aýdandardan kelýde. Dárigerler sany da kóbeıdi»,-deıdi MO Densaýlyq saqtaý basqarmasy basshysynyń orynbasary Lázzat Esenǵalıeva.
Búgingi tańda 91 naýqas emdelýde. Onyń 17-si qyzylshamen túsken. Qalǵandary ish ótý, bronhıt sııaqty dıagnozdarmen em qabyldaýda. Naýqastardyń 50%-y Munaıly aýdanynan kelgen. Sebebi, óńir boıynsha tek Munaıly aýdandyq aýrýhanasynda juqpaly aýrýlar bólimi joq. Sondyqtan olar Aqtaýǵa kelýge májbúr. Máselen, 1 jasar balasymen túsken Gúlbaný Ibragımova da Munaılynyń turǵyny.
«Óte aýyr jaǵdaıǵa tústik. Balam qusty, ishi ótti. Densaýlyǵy birqalypty. Tek jóndeý kerek»,-deıdi ol.
Munaıly aýdanynda aýrýhana salý josparlanyp otyr. Іshinen juqpaly aýrýlar bólimi ashylmaq. Qazir smetalyq qujattary jasaqtalyp jatyr. MO Densaýlyq saqtaý basqarmasy basshysy orynbasarynyń málimdeýinshe, Aqtaýda naýqastardy qosymsha qabyldaıtyn talapqa saı keletin jańa ǵımarat izdestirilýde. Qazirgi qoldanystaǵy ǵımarattyń da jaǵdaıy durystalmaq.