Mańǵystaýda komandırdiń burynǵy orynbasaryna úkim shyǵaryldy
AQTAÝ. QazAqparat - Búgin Aqtaý garnızony áskerı sotynda «Ońtústik» óńirlik qolbasshylyǵy áskerleri qolbasshysynyń burynǵy orynbasary Sabyr Kaıýmovqa qatysty úkim shyǵaryldy. Ol iri kólemde qarjy jymqyrǵany úshin aıyptaldy, dep habarlaıdy «QazAqparat» HAA tilshisi.
Joǵary áskerı shendi áskerı qyzmetkerdi birneshe jyl buryn bolǵan iske baılanysty sottady. Ol kezde polkovnık Sabyr Kaıýmov QR QM «25744 áskerı bólimi» RMM komandıri bolǵan. Ol óziniń qyzmetin qoldana otyryp, iri kólemde qarjy jymqyrǵan. Polkovnıkti «Alaıaqtyq» baby boıynsha aıyptady.
«Sottyń úkimine sáıkes, «Ońtústik» óńirlik qolbasshylyǵy áskerleri qolbasshysynyń burynǵy orynbasary Sabyr Kaıýmov QR QK 190-baby boıynsha aıypty dep tanyldy. Onyń jeke múlki tárkilenip, bes jylǵa bas bostandyǵynan aıyryldy. Sondaı-aq, ol ómir boıyna memlekettik qyzmetten shettetildi jáne «polkovnık» áskerı ataǵynan aıyryldy. Úkim zańdy kúshine engen joq», - dedi Aqtaý garnızony áskerı soty baspasóz qyzmetiniń ókili Janargúl Qolǵanat.
Sot isine Aqtaý garnızony áskerı sotynyń sýdıasy Marat Aldabergenov tóraǵalyq etti.
