Mańǵystaýda kógildir otyn qymbattaýy múmkin

AQTAÝ. QazAqparat - Mańǵystaýda taǵy da kógildir otyn qymbattaýy múmkin. Bul týraly «Qaztransgazaımaq» kompanııasynyń ókilderi málim etti, dep habarlaıdy QazAqparat tilshisi.

Ázirge bul joba kúıinde. Alaıda usynystyń iske asýy ǵajap emes. Gazdyń kóterme baǵasyn 15 paıyzǵa ósirý týraly buıryqty Energetıka mınıstrligi mamyr aıynda qabyldaǵan. Kógildir otyndy elimizde taratatyn «Qaztransgazaımaq» kompanııasy tarıfti 9 paıyzǵa ósirýdi surap otyr. Munyń sebebin tutynýshylardyń kóbeıýimen túsindirýde.

«Jańa aýdandar paıda boldy. Tutynýshylar kóbeıdi. Sondyqtan mamandar tartý qajettiligi týyp otyr. Materıaldyq shyǵyndar kóbeıdi. Keıbir taýarlar da qymbattady. Sondaı-aq, qural-jabdyqtardy jańartý kerek», - deıdi  «Qaztransgazaımaq» MOF dırektory Alpamys Qısmetov.

Elimizdiń  gaz naryǵynda negizgi úlesti alyp otyrǵan kompanııanyń búginde 1,7 mln abonenti bar. Onyń 150 myńy Mańǵystaýda. Qazirgi tańda óńirde 3 875 shaqyrymdyq  gaz jelisi júrgizilse, bıyl 100 shaqyrym taǵy tartylady.

«Qaztransgazaımaqtyń» eń iri tutynýshysy «MAEK-Qazatomónerkásip» seriktestigi buǵan narazy. «Onsyz da gazdyń boryshy 3 mlrd teńgeden asady. Bul sheshim kommýnaldyq qyzmet qunyn qymbattady», - kommýnaldyq kompanııa.

Aıta ketý kerek, kommýnaldyq qyzmet quny byltyrdan beri 7 paıyzǵa ósken. Al qala turǵyndary baǵany kóterý negizsiz ekenin alǵa tartady. Sebebi gaz qymbattasa, kommýnaldyq qyzmet quny da sharyqtap ketedi.

«Qoǵamdyq talqylaý zańdylyqtary buzyldy. Men ekonomıst retinde aıtarym, kompanııanyń tarıfti ósirýine negiz joq. Qaryzdardy óndirip alsa, tarıfti ósirmeı-aq qubyrlardy keńeıtýine bolady. Al tutynýshylar kóbeıdi degen sebepti túsinbedim. Naryq zamanynda kompanııalar tutynýshyǵa talasý kerek emes pe?», - deıdi  Aqtaý qalasynyń turǵyny Nıkar Rafıkova.

Endi sońǵy sheshimdi Tabıǵı monopolııalardy retteý komıteti qabyldaıdy.