Mańǵystaýda qoǵamdyq kólikte jolaqy qymbattady
ASTANA. QazAqparat - Mańǵystaý oblysynda qoǵamdyq kólikterde jolaqy quny kóterildi. 13 baǵyt boıynsha júretin marshrýt tarıfi 10 teńgeden 150 teńge aralyǵynda ósti, dep habarlaıdy QazAqparat tilshisi oblys ákimdiginiń baspasóz qyzmetine silteme jasap.
Baǵanyń ósýi oblysishilik turaqty jolaýshy tasymaly marshrýttaryna qyzmet kórsetýshi 8 mekemeden jolaqy qunyn kóterý jóninde kelip túsken ótinish boıynsha iske asyp otyr.
«Tasymaldaýshylardan jolaqy qunyn kóterý jónindegi ótinishterdiń túsý sebebi: búgingi naryqtaǵy janar-jaǵarmaı baǵasynyń turaqsyz ósýi, qosalqy bólshekter men servıstik qyzmet kórsetýdiń qymbattaýy, jańa avtokólik baǵasynyń, avtostantsııalardaǵy jaldaý aqysynyń ósýi jáne sonyń saldarynan tasymaldaýshylardyń júris shyǵyndarynyń aqtalmaýy bolyp otyr», - deıdioblystyq jolaýshylar kóligi jáne avtomobıl joldary basqarmasynyń basshysy Álibı Kósherbaev.
Tasymaldaýshylardan túsken ótinishterdiń negizinde Oblystyq jolaýshylar kóligi jáne avtomobıl joldary basqarmasy Turaqty aýdanaralyq (qalaaralyq, oblysishilik) qatynastary tarıfteri jónindegi arnaıy Komıssııa qurylǵan.
Komıssııa músheleri oblysishilik turaqty jolaýshy tasymaly marshrýttaryna qyzmet kórsetýshi 8 tasymaldaýshynyń jolaqy qunyn kóterý jónindegi ótinishteri men anyqtamalaryn, tarıf esepteri men negizdemelerin ótkizilgen komıssııa otyrystarynda tıisti deńgeıde qarap, zerttegen.
«Ortaq daýys berý nátıjesinde komıssııa quramynyń jartysynan kóp bóligi (75%) turaqty jolaýshy tasymaly marshrýttarynyń tarıf qunyn kóterýdi qoldady», - deıdi Álibı Kósherbaev.
Bılet qunyndaǵy ózgerister oblystyq máslıhattyń sheshimimen, oblys ákimdiginiń qaýlysymen bekitildi. Atap aıtqanda, "Aqtaý-Jańaózen" baǵyty 590 teńgeden 750 teńgege, «Aqtaý-Shetpe» baǵyty 580 teńgeden 750 teńgege ósken.
Ózgerister tómendegi kestede kórsetilgen.
