Mańǵystaýda qıyrshyq tas shyǵaratyn karerlerge shekteý qoıyldy

AQTAÝ. QazAqparat – Mańǵystaý oblysynda Shetpe turǵyndary kótergen másele oń sheshimin tapty. Aýyl mańynda qıyrshyq tas óndiretin kompanııalardyń shańy osy ýaqytqa deıin kópshiliktiń narazylyǵyn týdyryp keldi, dep habarlaıdy QazAqparat tilshisi.

Endi olar (arnaıy komıssııanyń 24 jeltoqsandaǵy sheshimi boıynsha) óz jumysyn toqtatty.

Osy máselege qatysty oblystyq deńgeıde arnaıy komıssııa qurylyp, jer qoınaýyn paıdalanatyn kásiporyn ıelerine qorshaǵan ortany qorǵaý talaptarynan saqtaý birneshe talap qoıyldy.

«Tasty usaqtaý barysyndaǵy shańnyń paıda bolýyna áser etetin obektilerdi shatyrlarmen nemese basqa angarlarmen jabý; shań basý úshin sý sebý jumystaryn jandandyrý; karerge baratyn joldardy tolyqtaı asfalttaý; kógaldandyrý; josparlanǵan jarylystar kezinde jarylys kúshin azaıtýǵa, shańdy basýǵa, jarylys aldynda jergilikti ákimdikterge habarlama jiberý», sekildi talaptardy kompanııalar oryndaýy kerek bolǵan.

Joǵaryda atalǵan jumys josparlaryn usyný úshin 2019 jyldyń 15 jeltoqsanyna deıin ýaqyt belgilen edi.

Sonymen qatar, atalǵan mekemelerde qorshaǵan ortany qorǵaý salasyndaǵy quzyretti organdar keshendi tekseris júrgizdi. Nátıjesinde karerlerde zań buzýshylyqtar anyqtalyp, zań talaby negizinde aıyppul salyndy. 11 jer qoınaýyn paıdalanýshy mekemege mynadaı sheshim qabyldandy.

«Shetpe Tas» JShS, DK «ShQ A. Seıdalıev» mekemeleri jumysyn túbegeıli toqtatty.

Al, «MKDSM» AQ, «Temirtas-1» JShS, «Aıan Aqtaý» JShS, «Baı-Beg» JShS mekemeleri jumysyn ýaqytsha toqtatty.