Mańǵystaýda keıingi eki jylda qyzylsha aýrýy tirkelmedi

AQTAÝ. QazAqparat – Mańǵystaý oblysynda 2021 jyldan beri qyzylsha aýrýy tirkelmegen. Qazirgi tańda óńirde epıdemıologııalyq jaǵdaı turaqty. Bul týraly óńirlik sanıtarııalyq-epıdemıologııalyq baqylaý departamentiniń basshysy Gúlnar Kórkinbaeva málim etti, dep habarlaıdy QazAqparat tilshisi.

Búginde elimizdiń basqa aımaqtarynda indet órshýine baılanysty, óńirde qyzylsha aýrýynyń aldyn alý boıynsha is-sharalar belsendi júrgizilip jatyr.

«Juqpaly dertten qorǵanýdyń eń tıimdi tásili – ekpe. Sol arqyly ǵana syrttan kelgen indetten saqtana alamyz. Qazir oblysta 8 420 doza ekpe bar. Aldaǵy ýaqytta taǵy ákelinedi dep josparlanyp otyr. Biz jyl basynan beri 1 jastan 17 jasqa deıingi adamdardyń ekpesine revızııa júrgizdik. Nátıjesinde 16 513 adamnyń vaktsına almaǵandyǵy anyqtaldy», - dedi Gúlnar Kórkinbaeva qoǵamdyq kommýnıkatsııalar ortalyǵynda ótken brıfıngide.

Aıta ketsek, Mańǵystaý oblysy aımaǵynda sońǵy ret 2020 jyly qyzylshamen 361 adam aýyrsa, 2019 jyly 1 422 jaǵdaı anyqtalǵan.