Mańǵystaýda Kendirli aýyly qurylady

AQTAÝ. Qazaqparat – Mańǵystaýdaǵy Jańaózen qalasynda halyq sanynyń ósýine baılanysty Rahat aýyly ekige bólinip, jańadan Kendirli aýyly qurylady, dep habarlaıdy QazAqparat tilshisi oblystyq koǵamdyq kommýnıkatsııa ortalyǵyna silteme jasap.

Jańaózen qalasy ákiminiń orynbasary Nurbergen Hýdıbaev málimetinshe, Rahat aýylyn ekige bólýge mamandardyń jetispeýshiligi, halyq sanynyń kúrt ósýi, kommýnaldyq qyzmetterdiń ýaqytyly kórsetilmeýi sebep.

«Búgingi kúni Rahat aýyly halqynyń sany – 45 848 adam quraıdy. Halyq sany jyl basymen salystyrǵanda 2 555 adamǵa ósip otyr. Aıta ketsem, 2017 jyly - 32 111 adam, 2018 jyly – 38 267 adam, 2019 jyly – 43 293 adamǵa ósim bar. Aýyldyń jalpy kólemi – 4 605,2 gektar. Rahat aýylyndaǵy «Aqsý», «Mereı» «Rahat» shaǵynaýdandary «Rahat» aýylynyń quramynda qalyp, «Juldyz» shaǵynaýdany jańadan qurylatyn Kendirli aýylynyń quramyna kiredi»,- dedi Nurbergen Hýdıbaev.

Máselen, turǵyny 40 myńnan asatyn eldi mekende 18-20 memlekettik qyzmetker bolýy tıis. Al, aýylda maman tapshy.

«Rahat aýyly bólingen jaǵdaıda bıýdjet shyǵyndarynyń kólemi 771,2 mln.teńgeden 898,2 mln. teńgege deıin ulǵaıady. Usynylǵan bıýdjet shyǵyndary kóleminiń ósý sebebi mektepke deıingi bilim berý, tazalyq qyzmeti, kóshe jaryǵyna qyzmet kórsetý men aýyldy abattandyrý jumystarynyń aýqymyna baılanysty bolady»,-dedi Rahat aýylynyń ákimi Óserbaı Tabynshaev.

Keleshekte Kendirli aýylynda densaýlyq, bilim berý, sport, mádenıet, avtomobıl joldary, ınjenerlik-ınfraqurylym, memlekettik qyzmet kórsetý, turǵyn úı-kommýnaldyq sharýashylyǵy men kásipkerlikti damytý salasy damyp, jańa nysandar boı kóteredi dep josparlanǵan.