Mańǵystaýda ken ornynan shyqqan órt aýa sapasyn aıtarlyqtaı buzǵan

AQTAÝ. QazAqparat - Mańǵystaýda Qaraturyn ken ornyndaǵy órt boıynsha aldyn ala boljaý-zertteý qorytyndysy shyqty. Zerthanalyq taldama metan kontsentratsııasynyń normadan 40-50 ese aýytqyǵanyn anyqtady,dep habarlaıdy QazAqparat tilshisi.

«Bozashy munaı» seriktestigine qarasty Qaraturyn ken ornynda 9 maýsymda bastalǵan órt áli sóngen joq. Jalyndy sóndirý jumystary jalǵasyp jatyr.

Oblystyq ekologııa departamenti mamandary qazirgi ýaqytta apatqa qatysty taldama jumysyn júrgizgen.

Onyń nátıjesi boıynsha órtten qorshaǵan ortaǵa zııan kelgeni anyqtalǵan.

«Aýadaǵy lastaýshy zattardyń quramynda edáýir aýytqýlardyń bar ekeni anyqtaldy. Sonymen qatar jer resýrstarynyń búliný faktorlary oryn alyp jatyr. Aldyn ala zerthanalyq taldama metan kontsentratsııasynyń normadan 40-50 ese aýytqyǵanyn aıqyndap otyr», - dedi Mańǵystaý oblystyq ekologııa departamentiniń basshysy Rýslan Tókenov.

Tolyq zertteý órt sóngennen keıin júrgizilmek.

Sodan keıin qorshaǵan ortaǵa keltirilgen zalaldyń kólemi, sondaı-aq bolǵan oqıǵa úshin kim jaýap beretini anyqtalady.

Esterińizge sala keteıik, órt «Ońtústik Qaraturyn» munaı-gaz ken ornynda 9 maýsym túngi saǵat 03.25-te uńǵymany burǵylaý jumystary kezinde uńǵymadaǵy burǵylaý quraly kóterilip ketip, jer astynan gaz-sý qospasy atqylaýy sebebinen tutanǵan.

Bir adam zardap shekti.

13 maýsym saǵat 08:30-daǵy jaǵdaı boıynsha kraterge 302 tekshe metr eritindi tógildi.

Ot áli jalyndap jatyr.