Mańǵystaýda kelesi jyly kásibı sportshylar jattyǵatyn keshen ashylady
Bul týraly Óńirlik kommýnıkatsııalar qyzmeti alańynda ótken brıfıngte Mańǵystaý oblysynyń ındýstrııalyq -ınnovatsııalyq damý basqarmasynyń bólim basshysy Begıeva Amangúl Narǵulqyzy málimdedi.
Onyń aıtýynsha, «Qarapaıym zattar ekonomıkasy» baǵdarlamasyn damytý aıasynda Mańǵystaý oblysy boıynsha 40-tan astam joba usynylǵan.
Bul baǵdarlama aıasynda Úkimet óńdeý ónerkásibi jáne agroónerkásip kesheni salasyndaǵy basym jobalardy 2018-2020 jyldar aralyǵynda qoldaý baǵytynda 600 mlrd teńge qarastyryp otyr. Sonyń ishinde óńdeý ónerkásibin damytýǵa 400 mlrd teńge bólingen.
Bul nesıeleý baǵdarlamasyna negizinen jeńil ónerkásip, jıhaz ónerkásibi, tamaq jáne qaıta óńdeý ónerkásibi sondaı-aq, qurylys materıaldaryn óndiretin jáne týrızm, bilim salasy, kólik jáne logıstıka salasyndaǵy qyzmet túrlerin qamtıtyn jobalarmen barlyq bıznes sýbektileri qatysa alady.
Joba atalǵan salalardy damytý máselesine qatysty, sonyń ishinde júıelik deńgeıdegi, ortalyq jáne jergilikti deńgeıdegi birqatar is-sharalardy qamtıtyn 9 taraýdan turady.
«Qarapaıym zattar ekonomıkasyn» damytý jónindegi úkimet tapsyrmasyna sáıkes oblys ákimdigi men «Atameken» óńirlik kásipkerler palatasy negizinde qurylǵan jobalyq keńsede tıisti is-sharalar jospary jasaqtalyp, jumys júrgizilýde.
Búgingi tańda ekinshi deńgeıdegi banktermen jalpy somasy 3 mlrd teńgege 9 joba, onyń ishinde 2,46 mlrd teńge bolatyn 7 jobany «Damý» qory maquldap otyr.
«Damý» kásipkerlikti qoldaý qorynyń Mańǵystaý oblystyq fılıaly dırektory Gúljan Qalymbetovanyń aıtýynsha, jalpy somasy 2,20 mlrd teńgeniń 5 jobasyn sýbsıdııalaý týraly kelisimge qol qoıylǵan. Sondaı-aq 20 mln teńge somasynda nesıe boıynsha 1 joba, 10 mln teńge nemese nesıeniń 50%-yna kepildeme alǵan. Sonyń ishinde, óńirimizdegi óńdeý ónerkásibindegi azotty mıneraldy tyńaıtqyshtar óndiretin iri kásiporyn «KazAzot» AQ - da osy baǵdarlama aıasynda nesıe alýǵa qoldaý tapqan.
Aıta ketetin bir jáıt, osy jobanyń arqasynda kásibı sportshylardy daıyndaıtyn sport-saýyqtyrý kesheni ashylatyn boldy. Kásipkerdiń quny 100 mln teńge turatyn usynysyn «FORTE BANK» maquldap, keshen 2020 jyldyń mamyr aıynda ashylady dep josparlanýda.
«Bul degenimiz, kásibı sportshylar úshin taptyrmas múmkindik. Óıtkeni, olar jattyǵý úshin shetel aspaı, óz elimizde daıyndalyp, olımpıada oıyndaryna qatysa alady» , - dedi banktiń Mańǵystaýdaǵy fılıalynyń dırektory Abbat Órisbaev.
«Qarapaıym zattar ekonomıkasynyń» basqa jobalardyń artyqshylyǵy birinshiden, kásipker qandaı somada nesıe alam dese de shekteý joq. Ekinshiden, nesıeniń 50 paıyzyn «Damý» kásipkerlikti qoldaý qory sýbsıdııalap, 5 mlrd teńgege deıin nesıege kepil bola alady.