Mańǵystaýda qazaqstandyq «Robınzon Krýzo» turady
Meteorolog mamandyǵyn meńgergen Petr Ivanovıch alǵashynda Qulaly aralyna teńiz aıdynyndaǵy kún raıyn zertteýge ýaqytsha keledi. Keıin araldyń tabıǵatyn unatyp, osynda qalýdy uıǵarady.
«Qalaǵa jylyna bir ret shekarashylardyń tikushaǵy nemese kemesimen baryp kelemin. Alaıda ý-shý ortadan, tórt qabyrǵadan tez zerigip ketemin. Bala kezimnen taýdyń eteginde óstim, tabıǵatqa jaqynmyn. Munda taza aýa, tylsym tabıǵat, ózimdi araldyń qojaıynyndaı sezinemin», - deıdi ol.
Qazaqstandyq «Robınzon Krýzo» Petr Lýpenkov qazirgi tańda Mańǵystaý meteorologııalyq stansasynyń «Qulaly» aralyndaǵy ókili retinde ár úsh saǵat saıyn sý deńgeıin, tolqynnyń bıiktigi men jeldiń jyldamdyǵyn baqylap, ortalyqqa habarlap otyrady. Bul aqparattar teńizge shyqqan kemeler men balyqshylardyń qaýipsizdigi úshin asa qajet.