Mańǵystaýda Kaspıı jaǵalaýy elderiniń I halyqaralyq teatr festıvali bastaldy
AQTAÝ. QazAqparat - Búgin Aqtaýdaǵy Nurmuhan Jantórın atyndaǵy mýzykalyq-drama teatrynda Kaspıı jaǵalaýy elderiniń I halyqaralyq teatr festıvaliniń saltanatty ashylýy ótti, dep habarlaıdy Mańǵystaý oblysy ákiminiń baspasóz qyzmeti .
Kaspıı jaǵalaýy elderiniń I halyqaralyq teatr festıvali Túrki mádenıetin jáne ónerin damytý halyqaralyq uıymy (TÚRKSOI) bastamashylyǵymen jáne Mańǵystaý oblysy ákimdiginiń qoldaýymen ótkizilip otyr. Festıval «Qazaqstannyń Eńbek Eri», KSRO halyq ártisi, Qazaqstannyń halyq ártisi Asanáli Áshimovtiń 80 jyldyǵyna arnalady.
Festıvaldiń maqsaty - Kaspıı jaǵalaýy elderiniń teatr óneri salasyndaǵy yntymaqtastyǵyn kúsheıtý men mádenı jáne rýhanı baılanystardyń odan ári nyǵaıýyna úles qosý; teatr ónerin damytý jáne teatrlardyń shyǵarmashylyq bastamalaryn yntalandyrý; birlesken shyǵarmashylyq jobalarǵa jáne kásibı qarym - qatynasqa jaǵdaı jasaý; jurtshylyq nazaryn qazirgi zamanǵy jańa teatrlyq úderiske aýdarý.
«Elbasynyń «Bolashaqqa baǵdar: rýhanı jańǵyrý» atty maqalasynda: «Ulttyq kod, ulttyq mádenıet saqtalmasa, eshqandaı jańǵyrý bolmaıdy. Ulttyq salt-dástúrlerimiz, tilimiz ben mýzykamyz, ádebıetimiz, joralǵylarymyz, bir sózben aıtqanda ulttyq rýhymyz boıymyzda máńgi qalýǵa tıis»,- delingen. Al ulttyq mádenıetimizdi jasaıtyn jáne ony saqtaıtyn tulǵalarymyzdy ulyqtamasaq, óskeleń urpaq kimge qarap boı túzemek. El-jurt, jastar eline eńbegi sińgen tulǵalardy bilýge tıis. Sol sebepti búgingi «Kaspıı jaǵalaýy elderiniń І halyqaralyq teatr festıvaliniń» Asanáli Áshimovtiń 80 jyldyq mereıtoıyna oraı ótkizilýi bekerden-beker emes. Ol elimiz úshin úlken mártebe, maqtanysh, tárbıelik mańyzy zor oqıǵa. Sebebi aǵamyzdyń ónerdegi beınesine tek Ózimiz ǵana emes, Ózgelerdiń de qyzyǵýshylyǵy basym. Asanaly Áshimovtiń ómir joly men shyǵarmashylyǵy ósip kele jatqan jas býynǵa úlgi», - dedi ashylý rásiminde Mańǵystaý oblysynyń ákimi Eraly Toǵjanov.
Festıvalge qatysýǵa Kaspıı jaǵalaýy jáne túrki tildes elderdiń kásibı drama jáne mýzykalyq-drama teatrlary shaqyryldy. Sharaǵa Reseı, Ázerbaıjan, Iran jáne Qazaqstan elderi qatysýda.
