Mańǵystaýda Kaspıı teńiziniń jaǵalaýynda keme jóndeıtin zaýyt salynady

AQTAÝ. QazAqparat - Búgin óńir basshysy Nurlan Noǵaevtyń tóraǵalyǵymen Mańǵystaý oblysyn údemeli ındýstrııaldy damytý jónindegi óńirlik úılestirý keńesiniń otyrysy ótti. Bul jaıynda oblys ákiminiń baspasóz qyzmetine silteme jasap QazAqparat habarlaıdy.

Jıynda keme jasaý jáne keme jóndeý salasyndaǵy ınvestıtsııalyq joba qaraldy.

Atap aıtqanda, jergilikti kásipker teńiz aılaǵy bar keme jasaý jáne keme jóndeý zaýytynyń qurylysyn josparlap otyr.

Jańa kásiporyn 2025 jyly paıdalanýǵa berilýi tıis.

Nysan Aqtaý qalasy Ómirzaq aýylynyń aýmaǵynda salynady.

- Qazir kólemi joǵary tonnaj kemeleri bar azamattar jóndeý jumystaryn Reseı, Ázirbaıjan, Iran sııaqty kórshiles Kaspıı mańy elderinde júrgizýge májbúr. Sondyqtan biz atalǵan qyzmetti Mańǵystaýda iske asyryp, óńirdiń bıýdjetin tolyqtyrý maqsatynda osy jumysty qolǵa alǵymyz keledi. Joba aıasynda jylyna jalpy syıymdylyǵy 2000 tirkelimdik tonnany quraıtyn 9-10-nan astam kemege jóndeý júrgizilip, 2 jylda 1-2 keme qurastyrýdy kózdep otyrmyz. Qyzmet biliktilik qoǵamdastyqtarynyń qadaǵalaýymen halyqaralyq standarttarǵa sáıkes júzege asyrylady, - dedi «Keme jabdyqtary jáne servıs» kompanııasynyń bas dırektory Dmıtrıı Donskıh.

Aıta keteıik, zaýyt tolyq iske qosylǵannan keıin 200-ge jýyq adamdy turaqty jumyspen qamtamasyz etedi.

Úılestirý keńesiniń músheleri usynylǵan jobany maquldady.

Oblys ákimi Nurlan Noǵaev júzege asyrylatyn jobalarǵa jergilikti atqarýshy organdar tarapynan qajetti qoldaý kórsetiletinin aıtty.

Jıyn qorytyndysy boıynsha óńir basshysy jaýapty tulǵalarǵa birqatar tapsyrma júktedi.