Mańǵystaýda qaraýsyz jatqan uńǵydan munaı atqylady

AQTAÝ. QazAqparat - Mańǵystaý oblysy Qaraqııa aýdany mańyndaǵy qaraýsyz jatqan uńǵydan munaı atqylaǵan. Saldarynan jer búlinip, qorshaǵan ortaǵa zalal keltirildi, dep habarlaıdy QazAqparat tilshisi.

Bul jaǵdaı boıynsha ekologııa departamentiniń mamandary tekserý júrgizgen. Nátıjesinde ekologııalyq apat bolǵan jer «Shalva» jáne «Kamınıstoe neft» seriktestikterine tıesili ekeni anyqtaldy. Alaıda atalǵan mekemeler 2017 jyldan beri qyzmetin toqtatqan. Qazir munaı salasyndaǵy ózge kompanııaǵa ótinish jiberilip, búlingen jer zalalsyzdandyrylyp jatyr.

«Departament tarpynan jáne ýákiletti organdardyń tarapynan jumystar júrgizilip, máseleni sheshý jóninde ıaǵnı atalǵan jerdi ıgerý boıynsha tıisti memlekettik mekemelerge hat joldandy. Jumystar júrgizilip jatyr», - dedi Mańǵystaý oblystyq ekologııa departamentiniń bólim basshysy Gúlim Ulyqpanova.