Mańǵystaýda karantın rejımin buzǵandarǵa 15 mıllıon teńgege jýyq aıyppul salyndy
Bul týraly aımaqtyń qoǵamdyq kommýnıkatsııalar ortalyǵynda ótken baspasóz máslıhaty barysynda oblystyq taýarlar men qyzmetterdiń sapasy men qaýipsizdigin baqylaý departamentiniń bastyǵy Ǵazız Nadýev málim etti, dep habarlaıdy QazAqparat tilshisi Lada.kz aqparat kózine silteme jasap.
Osy jyldyń qyrkúıek aıynda aımaqta statıstıka koronavırýs ınfektsııasyn juqtyrý boıynsha nóldik kórsetkishti kórsetip turǵan edi. Al qazan aıynda koronavırýs juqtyrýdyń 19 jaǵdaıy tirkeldi. Ǵazız Nadýev muny karantın talaptaryna qaramastan jergilikti halyqtyń jasyryn toı jáne eske alý sharasyn ótkizýimen tikeleı baılanystyryp otyr.
«17 tamyzdan bastap 19 monıtorıng toby jumys istep keledi. Osyǵan deıin 1900 nysanǵa jumysyn bastaýǵa ruqsat etildi. Olardyń 294-ne ǵana reıd júrgizildi. 17 tamyzdan 7 qazanǵa deıin Aqtaýda 55, Jańaózende 61, Munaılyda 66, Beıneýde 30, Qaraqııada 20 ret reıd júrgizildi. 6 shildeden bastap Mańǵystaý oblysyndaǵy kásipkerliktiń ártúrli nysandaryna jalpy somasy 14 931 750 teńge bolatyn 130 aıyppul salyndy. Olardyń ishinde 17-i karantın rejıminiń buzylýy, 12-i otbasylyq is-sharalardy ótkizýi, 70 maska rejıminiń buzylýy, 31 dezınfektsııa rejıminiń buzylýyna qatysty tirkelip otyr», - deıdi Ǵazız Nadýev.
Karantın rejımi bastalǵaly beri polıtsııa qyzmetkerleri mobıldi top múshelerimen birge reıdter júrgizgen. Sol kezde sanıtarııalyq qaýipsizdikti saqtamaı, bekitilgen merzimde jumysyn toqtatpaǵan nysandardyń ıelerine aıyppul salynǵan.
«Meıramhanalar men dámhanalar, monshalar, shashtarazdar, kásipkerliktiń basqa da nysandary tekserildi. 894 zańbuzýshylyq anyqtalyp, 130 adamǵa aıyppul salyndy. Sonymen qatar 13 ákimshilik quqyqbuzýshylyq anyqtalyp, merekelik sharalardy ótkizgeni úshin ákimshilik aıyppuldar salyndy», - dedi Mańǵystaý oblysynyń jergilikti polıtsııa qyzmeti basqarmasy bastyǵynyń mindetin atqarýshy Qaldymurat Aıǵaraqov.