Mańǵystaýda qaraquıryq aýlaǵandar ustaldy

AQTAÝ. QazAqparat – Beıneý aýdanynda polıtsııa qyzmetkerleri qaraquıryq aýlaǵandardy ustady, dep habarlaıdy QazAqparat tilshisi.

«Brakoner» jedel-aldyn alý sharasy barysynda Beıneý aýdanynda polıtsııa qyzmetkerleri eki er adamdy ustady. Olar mingen mototsıklden Qazaqstan Respýblıkasynyń Qyzyl kitabyna engen qaraquıryqtyń eti, sondaı-aq, 16 kalıbrli ekiaýyzdyq tegis uńǵyly myltyq, 23 oq-dári, pyshaq tabylyp, tárkilendi.

«Ózimen birge motokólikti basqarýǵa qujattar bolǵan joq. Qazir ustalǵandarǵa qatysty «zańsyz ań aýlaý« faktisi boıynsha qylmystyq is qozǵaldy. Bul fakt QR QK-niń 337-babynyń 4-bóligi boıynsha sotqa deıingi tergeýdiń biryńǵaı tizilimine tirkelgen. Ańǵa oq atqan kúdiktiniń biri ýaqytsha qamaý abaqtysyna jabyldy. Sot-krımınalıstıkalyq saraptama taǵaıyndaldy. Mototsıkl aıyp turaǵyna qamaýǵa alyndy» delingen habarlamada.