Mańǵystaýda qańǵybas ıtter qoradaǵy maldy túgel qyryp ketken
AQTAÝ. QazAqparat - Túpqaraǵan aýdany Saıyn Shapaǵatov aýylynyń turǵyndary qańǵybas ıtter mal men adamǵa shabýyl jasap jatyr dep dabyl qaǵýda, dep habaraıdy Qazaqparat tilshisi.
Búgin kóshede qaraýsyz bosyp júrgen ıtter osy eldi mekendegi Baqyt Erdáýletovtyń qorada turǵan 5 qoı, 2 eshkisin qyryp ketken.
«Tańerteń qoraǵa qaraı bara jatsam, aınalasynda qańǵybas ıtter tolyp júr. Júregim zý ete qaldy. Qoraǵa qaraı júgirdim. Qoılarym qyrylyp jatyr. Bári ólgen. Jalǵyz bizdiń qoraǵa emes, osydan 3-4 kún buryn osyndaı oqıǵa boldy dep estigem. Qazir oblysta maldar qutyrýmen aýyrýda. Sodan qorqamyn. Itterge de juqqan bolsa, balalarǵa men adamdarǵa zııany tıe me dep», - deıdi Baqyt Erdáýletov.
Sharýa ıesi jergilikti ákimdikke baryp, mán-jaıdy aıtypty. Mal dárigeri, depýtattar, aýyl ákiminiń orynbasary qoraǵa kelip, shyǵynnyń ótelmeıtinin aıtqan. Tek mal qutyryp ne aýyryp ólgen jaǵdaıda ǵana ótemaqy beriledi eken. Endi Baqyt Erdáýletov buralqy ıtterdiń kózin joıýdy suraıdy.
Qazir jergilikti ákimdik pen polıtsııa qyzmetkerleri buralqy ıtterdi aýlaýǵa kirisken. Túpqaraǵan aýdany aýyl sharýashylyǵy jáne veterınarııa bóliminiń basshysy Amanqos Jumaǵazıevtyń aıtýynsha, arnaıy komıssııa da qurylǵan.
Aýyl turǵyndary osyǵan deıin 40-qa tarta qoı-eshkiniń ólgenin aıtty. Tipti, bala men áıeldi tistep alǵan. Itterdiń shabýyly, ásirese sońǵy 2 aptada kóbeıip ketken.
Basty foto:feo.rf
