Mańǵystaýda «Isa» jáne «Dosan» atty shekaralyq katerler paıdalanýǵa berildi
Baspasóz málimetterine qaraǵanda, keme basshylyǵyna áskerı-teńiz týyn oblys ákimi Eraly Toǵjanov jáne QR UQK Shekara qyzmetiniń dırektory D.Dilmanov tapsyryp sáttilik tiledi. Áskerı kemege 1870 jyly orys otarshyldaryna qarsy kóterilgen Isa Tilenbaev pen Dosan Tájıev bastaǵan mańǵystaýlyq eki batyrdyń esimderi berildi.
Áskerı keme Oral qalasyndaǵy «Zenıt» zaýytynda qurastyrylǵan. Atalǵan shekaralyq kemeler Qazaqstan Respýblıkasynyń memlekettik shekarasy men kontınenttik shelfiniń memlekettik aýmaqtyq sýlaryn qorǵaýǵa baǵyttalǵan. Sonymen qatar olarǵa munaı-gaz obektilerin qorǵap, terrorıstik kórinisterdiń, zańsyz balyq aýlaýdyń aldyn alý sııaqty mindetter júktelgen.
«Shekara qyzmetiniń qurylymdaryn materıaldyq-tehnıkalyq jaǵynan qamtamasyz etý máselesi de sheshilip keledi. Bul rette Elbasynyń tapsyrmasymen memleket bıýdjetinen UQK Shekara qyzmetiniń materıaldyq-tehnıkalyq bazasyn nyǵaıtýǵa jylma-jyl qomaqty qarjy bólinip keledi. Sonyń aıǵaǵy búgin paıdalanýǵa berilgeli otyrǵan «Isa» jáne «Dosan» shekaralyq kemeleri jáne paıdalanýǵa berilgen zamanaýı úlgidegi salynǵan teńiz aılaǵy. Bul aılaq shekarashylardyń aldynda turǵan problemalardy sheshýde úlken mańyzǵa ıe bolady. Osynyń bári Sizderdiń Otanymyzdy qorǵaýdaǵy qyzmetińizge erekshe serpin beretinine senimdimin», - dedi óńir basshysy Eraly Toǵjanov.
Teńiz aılaǵynyń qurylysy ótken jyldyń sońynda bastalǵan bolatyn. Aılaqtyń uzyndyǵy 150 metrdi quraıdy jáne bir mezgilde 10 áskerı keme toqtaı alady. Jańa teńiz aılyǵynyń basty ereksheligi zamanaýı úlgide salynǵan quraldary, órt sóndirý beketi, elektr qýat alý orny bar.
Baýtıno porty shekara kúzeti kemeleriniń Kaspııdiń ońtústik jáne soltústik bóligine jyldam shyǵýǵa múmkindik beredi.
