Mańǵystaýda ındýstrııalandyrý kartasy aıasynda 12 mlrd. teńgeniń 5 jobany júzege asady

Baspasóz málimetterine qaraǵanda, Memleket basshysynyń «Qazaqstannyń úshinshi jańǵyrýy: jahandyq básekege qabilettilik» atty 2017 jylǵy 31 qańtardaǵy Qazaqstan halqyna Joldaýynda qoıylǵan tapsyrmalarǵa, sondaı-aq strategııalyq, memlekettik jáne salalyq baǵdarlamalarǵa sáıkes Mańǵystaý oblysyn damytýdyń 2016-2020 jyldarǵa arnalǵan baǵdarlamasyn iske asyrý jalǵasýda.

Búgin Mańǵystaý oblysynyń ákimi Eraly Toǵjanov aımaq turǵyndary aldynda esep berip, 2017 jyldy qortyndylady. Osylaısha, óńirde munaı-gaz óndirýshi jáne servıstik kompanııalardyń turaqty qyzmetteriniń nátıjesinde ónerkásip óndirisiniń kólemi jyl basyndaǵy 96,9%-dan 100,1%-ǵa deıin ósti. Al negizgi kapıtalǵa salynǵan ınvestıtsııa kólemi 82,2%-dan 101%-ǵa deıin artty. Qurylys jumystarynyń kólemi 98,8%-dan 100,1%-ǵa deıin kóbeıdi. Sondaı-aq 2016 jylǵa qaraǵanda 17,6% ósimmen 833 myń sharshy metr turǵyn úı paıdalanýǵa berildi. Orta jáne shaǵyn bıznes sýbektileriniń sany 3 myń birlikke artyp, 47 myńǵa jetti.

2017 jyly Prezıdent ákimshiligi tuńǵysh ret óńirler arasynda bıznesti júrgizý jeńildigi reıtıngisin ótkizdi. Reıtıng qorytyndysy boıynsha Mańǵystaý oblysy 12-shi orynnan 2-shi orynǵa shyqty. Aýyl sharýashylyǵy sektorynda 14 mlrd. teńgeniń ónimi óndirilip, salanyń naqty kólem ındeksi 108,2% qurady. Bul respýblıka óńirleri arasynda damý qarqyny boıynsha birinshi kórsetkish.

Azyq-túlik taýarlarynyń tutyný baǵa ındeksi josparlanǵan mejede qaldy - 106,4% (RK 106,5%. Áleýmettik mańyzy bar azyq-túlik taýarlarynyń tutyný baǵa ındeksi 106,7% (RK 107,4%). Jyl basynan beri 31 myńǵa jýyq jańa jumys oryndary quryldy. Nátıjesinde jalpy jumyssyzdyq deńgeıi 5,0%-dan 4,9%-ǵa, jastar arasyndaǵy jumyssyzdyq 5,1%-dan 3,5%-ǵa deıin tómendedi.

2017 jyly 833 myń sharshy metr turǵyn úı paıdalanýǵa berildi. Bul 2016 jylmen salystyrǵanda 18%-ǵa artyq (respýblıka boıynsha 3-oryn). Ótken jyly 7000 otbasy jańa qonystanýshylar boldy. Turǵyn úı alýǵa18 myń adam, jer alýǵa 166 myń adam kezekte tur. Jalpy alǵanda barlyq makrokórsetkishterdiń oń dınamıkasy óńirlik ekonomıka ósimin 100% deńgeıinde qamtamasyz etýge múmkindik berdi.

«Aqtaý teńiz porty» arnaıy ekonomıkalyq aımaǵynda júzege asyrylatyn arnaıy jobalar erekshe baqylaýda. Jańa óndiristerdi ornalastyrý úshin barlyq qajetti jaǵdaılar jasalǵan. AEA aýmaǵy boıynsha respýblıkada úshinshi orynda.

Infraqurylymdy qurý úshin salynǵan 7 mlrd. teńge kóleminde bıýdjettik qarajat óz tıimdiligin kórsetti: 19 joba iske asyryldy, 95 mlrd. teńge ınvestıtsııa tartyldy, 260 mlrd. teńgege ónim óndirildi, bıýdjetke 23 mlrd. teńge mólsherde salyq tólendi. 1 323 jumys orny quryldy. Ótken jyly áleýetti ınvestorlarmen 20-dan astam kezdesý ótkizildi.

«El daǵdarysqa qarsy menedjmentten ornyqty damýǵa kóshýde. Osy maqsatta Memleket basshysy Qazaqstannyń Úshinshi jańǵyrýy, Indýstrııalandyrý baǵdarlamasy men «Sandyq Qazaqstan», 2025 jylǵa deıingi el damýynyń Strategııalyq jospary, «100 naqty qadam» jáne «Bolashaqqa baǵdar: rýhanı jańǵyrý» sııaqty barlyq qajetti strategııalyq qujattar men baǵdarlamalardy maquldady. Memleket basshysy atap ótkendeı, «Kól-kósir munaıdyń dáýiri aıaqtalyp keledi. Elimizge damýdyń jańa sapasy qajet».

Bul ekonomıkamyz ázirge munaı sektoryna táýeldi bolyp otyrǵan bizdiń óńir úshin de mańyzdy. Sondyqtan eń mańyzdy mindet - óńdeý sektoryn damytý. Osy baǵytta 5 %-dan (2015 jyl) 8%-ǵa (2017 jyl) deıin ósim bar. Ósim hımııa ónerkásibinde, mıneraldy ónimder, plastmassa jáne toqyma ónimderi, tazartylǵan ónimder, mashına jasaý jáne metallýrgııa salalarynda baıqalady. Biz qol jetkizgen baǵany tómendetpeýimiz kerek. Indýstrııalandyrý kartasy aıasynda oblysta 45 joba júzege asyrylyp, 395 mlrd. teńge ınvestıtsııalandy. 4 myńnan astam jumys orny ashyldy. Bıyl 12 mlrd. teńgege 5 jobany júzege asyrý josparlanýda, ol 223 jumys ornyn qurýǵa múmkindik beredi», - dedi Mańǵystaý oblysynyń ákimi Eraly Toǵjanov.

Ekonomıkanyń barlyq salasyn, áleýmettik, turǵyn-úı kommýnaldy jáne taǵy da basqa salalaryn tsıfrlandyrýǵa kóshirý maqsatynda aǵymdaǵy jyly Beıneý, Qaraqııa, Mańǵystaý aýdandarynyń 12 eldi mekenderin keń jolaqty ınternetke qosý jumystary aıaqtalady. Qarjysy 100% sheshildi. Qalǵan eldi mekender ınternetpen tolyqtaı qamtylǵan.

Oblysta 2017 jyly 26 balabaqsha paıdalanýǵa berildi, onyń ishinde 25-i jeke ınvestıtsııa esebinen. 3-6 jas aralyǵyndaǵy balalardy balabaqshamen qamtý kórsetkishi 93%. Jyl sońynda bul kórsetkishti 100%-ǵa jetkizý josparlanýda.

«Oblysymyzda týý kórsetkishi joǵary. Osyny eskere otyryp, úsh aýysymdy oqytýdy boldyrmaý úshin jańa mektepter salynýda. Bıyl 9 jańa mektep paıdalanýǵa berildi. Taǵy da 3 mektep salýdy josparlap otyrmyz. Olar - Aqshuqyr aýylynda 600 oryndyq mektep, Atameken jáne Basqudyq aýyldaryndaǵy mektepterge árqaısysy 320 oryndyq qosymsha ǵımarat», - dedi oblys ákimi Eraly Toǵjanov.