Mańǵystaýda ІІ halyqaralyq teatr festıvali márege jetti
ASTANA. QazAqparat - Mańǵystaý óńirinde 4 kúnge sozylǵan Kaspıı jaǵalaýy elderiniń ІІ halyqaralyq teatr festıvali óz máresine jetti, dep habarlaıdy óńirlik ákimdiktiń baspasóz qyzmeti.
Sharanyń jabylý saltanatyna oblys ákiminiń orynbasary Rýslan Sakeev, festıvaldiń qazylar alqasy men uıymdastyrýshylary, 8 teatr ujymynyń ókilderi (Ázerbaıjan, Iran, Túrkimenstan, Tatarstan, Bashqurtstan - RF) qatysty.
«Birneshe kún boıy qazaq sahnasy sańlaǵynyń atyn ardaqtap, rýhyna qurmet kórsetýge arnalǵan óner merekesi barysynda Nurmuhan Jantórın atyndaǵy qara shańyraqtyń tórinde segiz teatr ujymynyń keıipkerleri kórermenmen alty tilde syrlasty, muńyn shaǵyp, ǵıbratty sózderin aıtty. Óner ujymdary ózara tájirıbe almasty, ózara shyǵarmashylyq yntymaqtastyqqa negiz qalady. Anadoly elinen, Edil-Jaıyqtyń saǵasynan, Saryarqa men Marynyń dalasynan, Alataý men Kavkazdyń baýraıynan arnaıy kelip, Kaspıı jaǵalaýy elderiniń ekinshi teatr festıvaliniń oıdaǵydaı ótýine bir úıdiń balasyndaı barlyǵy at salysty. Ejelden tatý kórshi halyqtardyń mádenıeti men óneriniń órisin keńeıtip, rýhanı birligin nyǵaıtýǵa festıval úlken úlesin qosty dep aıtýǵa tolyq negiz bar», - dedi Saltanatty keshte sóz alǵan Rýslan Sákeev.
Osylaısha myńdaǵan kórermendi kózaıym etip, qýanyshqa bólegen festıvaldi sheteldik qonaqtar joǵary baǵalap, uıymdastyrýshylarǵa óz rızashylyqtaryn bildirdi.
Kesh barysynda Qazaqstannyń Eńbek Eri, KSRO halyq ártisi Asanáli Áshimov sóz sóılep, teatr sahnasynda alǵash somdaǵan rólinen úzindiler keltire otyryp: «Teatr - shynaıy ónerdiń, adal dostyqtyń, rýhanı baılyqtyń ordasy. Mine, 4 kún boıy Kaspıı jaǵalaýy elderiniń arasyndaǵy dostyq qatynasymyzdy nyqtaı bildik dep aıta alamyn. Halqymyzdyń birtýar azamaty, uly akter Nurmuhan aǵamnyń árýaǵy rıza bolsyn! Festıvalge qatysqan barlyq teatr ujymdaryna shyn júregimmen alǵysymdy bildiremin. Uly tulǵany ulyqtap, kelgen qonaqtaryn jyly qarsy alyp, 4 kún boıy eshqaıda jibermeı qonaq qylǵan osy ólkeniń basshylaryna, ásirese, Mańǵystaý oblysynyń ákimi Eraly Toǵjanovqa, festıval ótip jatqan teatr dırektory Nurnııaz Muhanovqa rahmet aıtamyn. Kaspıı jaǵalaýy elderi teatrlarynyń mádenı-rýhanı yntymaqtastyǵynyń arqasynda dostyq, joldastyq qatynasymyz nyǵaıa bersin demekpin», - dep, uıymdastyrýshylarǵa qazylar alqasy músheleriniń atynan rahmetin aıtty.
Sarapshylar alqasynyń sheshimimen Nurmuhan Jantórınniń 90 jyldyǵyna arnalǵan Kaspıı jaǵalaýy elderiniń ІІ halyqaralyq teatr festıvaline qatysqan barlyq teatr ujymy úzdik óner kórsetkenderi úshin arnaıy dıplomdarmen marapattaldy. Sondaı-aq, teatr sahnasynda tórt kún boıy tamasha qoıylymdaryn usynyp, bir-birimen tájirıbe almasqan óner ujymdaryna «TÚRKSOI» Halyqaralyq túrki mádenıeti uıymynyń estelik syılyqtary tabys etildi.
Festıval barysynda N.Jantórın atyndaǵy oblystyq mýzykalyq drama teatrynyń ártisteri ázirlegen kontserttik baǵdarlamasy usynyldy.
Halyqaralyq deńgeıdegi úlken mádenı shara óz máresine jetip, Mańǵystaý - rýhanı baılyqtyń ordasy ekenin taǵy bir dáleldedi.
