Mańǵystaýda ıen dalada joǵalǵan áıel men balany eki kún boıy izdedi
Bir top adam «Aqtaý - Bozjyra - Qyzylqupy - Qarynjaryq - Buloıyq úńgiri» baǵyty boıynsha jolǵa shyqqan. Top ishinde Olga atty kelinshek basqalardan bólinip, basqa jolǵa túsip ketken. Kólikte anasymen birge jasóspirim bala bolǵan. Olardy eki kún boıy izdedi.
Kelinshektiń qurbysy Irına Mýravevanyń aıtýynsha, 4 kólik 29 tamyzda týrıstik saparǵa shyǵady. Arada bir táýlik ótkende olar Ústirt qoryǵyna jetedi. Sol jerge túnep, erteńinde týrıster sońǵy núkte - Buloıyq úńigirine qaraı attanǵan.
«Jolda ketip bara jatqanda Olga bizge basqa jolmen baratynyn eskertti. Óıtkeni ol buǵan deıin de álgi úńgirge birneshe ret barǵan. Kólikte janarmaı jetkilikti edi. Biz úńgirde kezdesemiz dep kelistik. Biraq dittegen jerge jetkende Olgany tappadyq. Ol bárimiz jolǵa attanǵan núktege qaıtyp ketken bolar degen oımen biz artqa qaıttyq. Biraq ony esh jerden tappadyq. Shekarashylar men qoryqshylar eshqandaı kólikti kórmedik dedi. Biz óz betimizshe izdeýge kirisip kettik. Jolaı «Legıon týr» birlestiginiń adamdaryn kezdestirdik, olar óz sharýasyn ysyryp qoıyp, bizge kómekke keldi. Jarty táýlik izdep tappaǵan soń Jańaózenge baryp, áıel men bala joǵalǵanyn habarladyq. Sosyn joǵalǵandardy izdeýge qutqarýshylar jedel qosyldy» deıdi Irına.
2 qyrkúıek kúni izdeý jumystarynyń nátıjesinde Olga men balasy tabyldy. Týrısterdiń kóligi beımálim sebeppen órtenip ketken eken.
«Olardyń as-sýy az edi, onyń ústine qula túzde qoryqtyń jyrtqysh janýarlary bar, olarǵa shynymen úlken qaýip tónip turǵan bolatyn. Eger qutqarýshylar jedel qımyldamaǵanda áıel men balanyń jaǵdaıy ne bolar edi, kim bilsin. Biz Olga men balasyn qutqarýǵa atsalysqan barsha janǵa shynaıy rızashylyǵymyzdy bildiremiz» deıdi Irına Mýraveva.