Mańǵystaýda halyqtyń egilýge jatqyzylatyn tobynyń 17%-y vaktsınanyń I komponentin aldy
Bul týraly Qoǵamdyq kommýnıkatsııa ortalyǵynda ótken brıfıngide Mańǵystaý oblysy densaýlyq saqtaý basqarmasy basshysynyń orynbasary Amanbek Jumyrov málim etti.
«Óńirde vaktsınatsııa júrgizilgeli oblys boıynsha I komponentpen 59004, II komponentpen 34224 adam egildi. Degenmen, Mańǵystaý óńiri ekpe alýdan respýblıka boıynsha eń tómengi orynda. Qaýipti indetten qorǵanýdyń birden-bir joly vaktsınatsııa. Sol sebepti halyqty vaktsınatsııalaý jumysyn qarqyndy júrgizý qajet. Aqparattyq-túsindirý jumystary áli de jalǵasatyn bolady», - dedi Amanbek Jumyrov.
Búginde oblysqa 209250 doza vaktsına jetkizildi. Onyń ishinde reseılik «Sputnik V» vaktsınasynyń I komponenti boıynsha 96150 doza, II komponenti boıynsha 57600 doza bar. Sondaı-aq «QazVac» ekpesiniń 4000 dozasy, «Hayat-Vax» vaktsınasynyń 31500 dozasy, «CoronaVac» ekpesiniń 20000 dozasy ákelindi.