Mańǵystaýda halyqaralyq «TENIZ-2018» oqý-jattyǵýy ótip jatyr
AQTAÝ. QazAqparat - Mańǵystaý oblysynyń ákimi Eraly Toǵjanov alǵash ret uıymdastyrylyp otyrǵan halyqaralyq «TENIZ-2018» keshendi oqý-jattyǵýynyń ashylý saltanatyna qatysty, dep habarlaıdy óńir basshysynyń resmı saıty.
Oqý-jattyǵý Kaspıı mańy elderiniń memleket basshylarynyń qatysýymen ótetin V sammıt qarsańynda arnaıy uıymdastyrylyp otyr. Eki kún boıy Qazaqstan, Ázerbaıjan, Reseı, Túrikmenstan memleketteriniń qutqarý qyzmetteri oqý-jattyǵý ótkizip, Kaspıı teńizi akvatorııasynda sondaı-aq, Kaspıı mańy memleketteri aýmaǵynda tabıǵı jáne tehnogendi sıpattaǵy tótenshe jaǵdaılardyń paıda bolýy kezinde qalaı áreket etý kerektigin meńgerip, tájirıbe almasady.
Oqý-jattyǵýdyń maqsaty - Kaspıı mańy elderi qutqarý qyzmetteri, jaǵalaý kúzeti men memlekettik mekemelerdiń tótenshe jaǵdaılarda birigip toıtarys berý arqyly qarym-qatynasyn nyǵaıtý. Sondaı-aq, kók aıdyndy jaǵalaı ornalasqan elderdiń qutqarý qyzmetteri arasyndaǵy áriptestikti odan ári damytý bolyp tabylady.
«Mańǵystaý oblysynda Aqtaý porty men Baýtın porty qarqyndy túrde damýda. 2016 jyly Quryq portynda parom kesheni iske qosyldy. Bul óz kezeginde transkaspıı halyqaralyq kólik-logıstıka dálizindegi mańyzdy baılanys bolyp tabylady. Budan bólek, Kaspıı teńizinde «Qashaǵan» iri munaı-gaz ken orny bar. Bul teńizdegi shuǵyl qyzmetterdiń róli erekshe ekendigin aıqyndaıdy. Jyl saıyn teńiz porttary arqyly 12,5 mln tonna júk tasymaldanady. Negizi basymdyq munaı, metall, bıdaı, konteınerlerge beriledi. Aqtaý porty júk tasymalynda erekshe ról atqarsa, Baýtın porty munaı operatsııalaryn ótkizýge mashyqtanǵan. Sondyqtan teńizdegi qaýipsizdik máselesi jiti nazarda bolýy shart. Biz teńizde oryn alatyn túrli oqys jaǵdaıda birigip jumys jasap, kásibı turǵyda shyńdalý kerekpiz», - dedi sharada sóz alǵan oblys ákimi Eraly Toǵjanov.
Oqý-jattyǵý eki kezeń boıynsha ótkiziledi. Alǵashqy kezeńde Qazaqstan, Ázerbaıjan, Reseı, Túrikmenstan elderi qutqarý qyzmetinen jasaqtalǵan komandalar tótenshe jaǵdaıda qalaı áreket etýdi meńgerse, ekinshi kezeńde Kaspıı teńizinde kemelerdiń soqtyǵysýy kezinde qalaı áreket etý kerek, kemede bolǵan órt kezinde adamdardy qutqarý, qyzyl jalynmen der kezinde kúresýdi, hımııalyq qaýipti zattardy joıýdy, burǵylaý qondyrǵysyndaǵy órtti joıýdy jáne sý tasqyny kezinde adamdardy qutqarýdy meńgeredi.
Oqý-jattyǵýǵa 500-den astam órt sóndirýshiler, qutqarýshylar, 78 arnaıy tehnıka, BE-200 ushaǵy, 7 tikushaq, 4 teńiz kemesi, 7 qutqarý qaıyǵy, órt sóndirý kóligi jumyldyrylǵan.
Sondaı-aq, ekinshi kezeńde qutqarý tehnıkasy men jabdyqtarynyń kórmesi uıymdastyrylady.
