Mańǵystaýda halyqaralyq «TENIZ-2018» oqý-jattyǵýy bastaldy
Oqý-jattyǵý Kaspıı mańy elderi memleket basshylarynyń qatysýymen ótetin V sammıt qarsańynda arnaıy uıymdastyrylyp otyr. Eki kún aıasynda Qazaqstan, Ázirbaıjan, Reseı, Túrkimenstan memleketteriniń qutqarý qyzmetteri oqý-jattyǵý ótkizip, Kaspıı teńizi akvatorııasynda, sondaı-aq, Kaspıı mańy memleketteri aýmaǵynda tabıǵı jáne tehnogendi sıpattaǵy tótenshe jaǵdaılardyń paıda bolýy kezinde qalaı áreket etý kerektigin meńgerip, tájirıbe almasady.
Oqý-jattyǵýdyń maqsaty - Kaspıı mańy elderi qutqarý qyzmetteri, jaǵalaý kúzeti men memlekettik mekemelerdiń tótenshe jaǵdaılarda birigip toıtarys berý arqyly qarym-qatynasyn nyǵaıtý. Sondaı-aq, kók aıdyndy jaǵalaı ornalasqan elderdiń qutqarý qyzmetteri arasyndaǵy áriptestikti odan ári damytýdy kózdeıdi.
«Mańǵystaý oblysynda Aqtaý jáne Baýtın porttary qarqyndy túrde damýda. 2016 jyly Quryq portynda parom kesheni iske qosyldy. Bul óz kezeginde - transkaspıı halyqaralyq kólik-logıstıka dálizindegi mańyzdy baılanys. Budan bólek, Kaspıı teńizinde «Qashaǵan» iri munaı-gaz ken orny bar. Bul teńizdegi shuǵyl qyzmetterdiń róli erekshe ekendigin aıqyndaıdy. Jyl saıyn teńiz porttary arqyly 12,5 mln tonna júk tasymaldanady. Negizgi basymdyq munaı, metall, bıdaı, konteınerlerge beriledi. Aqtaý porty júk tasymalynda erekshe ról atqarsa, Baýtın porty munaı operatsııalaryn ótkizýge mashyqtanǵan. Sondyqtan teńizdegi qaýipsizdik máselesi jiti nazarda bolýy shart. Biz teńizde oryn alatyn túrli oqys jaǵdaıda birigip jumys jasap, kásibı turǵyda shyńdalýǵa tıispiz», - dedi sharada sóz alǵan oblys ákimi Eraly Toǵjanov.
Oqý-jattyǵý eki kezeń boıynsha ótkiziledi. Alǵashqy kezeńde Qazaqstan, Ázirbaıjan, Reseı, Túrkimenstan elderi qutqarý qyzmetinen jasaqtalǵan komandalar tótenshe jaǵdaıda qalaı áreket etýdi meńgerse, ekinshi kezeńde Kaspıı teńizinde kemelerdiń soqtyǵysýy kezinde qalaı áreket etý kerek, kemede bolǵan órt kezinde adamdardy qutqarý, qyzyl jalynmen der kezinde kúresý, hımııalyq qaýipti zattardy joıý, burǵylaý qondyrǵysyndaǵy órtti sóndirý jáne sý tasqyny kezinde adamdardy qutqarýdy meńgeredi.
Oqý-jattyǵýǵa 500-den astam órt sóndirýshiler, qutqarýshylar, 78 arnaıy tehnıka, BE-200 ushaǵy, 7 tikushaq, 4 teńiz kemesi, 7 qutqarý qaıyǵy, órt sóndirý kóligi jumyldyrylǵan.
Sondaı-aq, ekinshi kezeńde qutqarý tehnıkasy men jabdyqtarynyń kórmesi uıymdastyrylady.
