Mańǵystaýda gaz óńdeý zaýyty jumysyn ýaqytsha toqtatady

AQTAÝ. QazAqparat  - 22 sáýir kúni Jańaózendegi Qazaq gaz óńdeý zaýyty jóndeý jumystaryna baılanysty ýaqytsha jumysyn toqtatady, dep habarlaıdy QazAqparat tilshisi.

Mańǵystaý oblystyq kásipkerlik jáne saýda basqarmasy basshysynyń orynbasary Tımýr Sádýaqasovtyń aıtýynsha,  zaýyttyń jumysy toqtaǵanymen óńirde suıytylǵan gazdyń tapshylyǵy bolmaıdy.

«Qazir qorda Qazaq gaz óńdeý zaýytynan shyqqan 2 myń tonna gaz, Aqtóbeden jetkizilgen 1 myń tonna gaz bar.  Suıytylǵan gazdyń baǵasyn baqylaýda ustap otyrmyz. Zaýyt óz jumysyn 27 sáýir kúni jalǵastyrady», - deıdi ol.

Eske sala keteıik, qazirgi ýaqytta Mańǵystaýda suıytylǵan gazdyń ortasha quny tómendetilgen baǵamen maýsym aıynyń sońyna deıin qoıylǵan. Gaz baǵasy qosymsha qun salyǵynsyz - 38 701 teńge.