Mańǵystaýda Ǵ. Músirepov atyndaǵy teatrdyń gastroli ótip jatyr

Mańǵystaý ólkesine Kaspıı mańy elderiniń II halyqaralyq festıvali aıasynda kelgen 73 jyldyq tarıhy bar Ǵ. Músirepov atyndaǵy óner ujymy - ulttyq jáne álemdik týyndylardy halyqqa keńinen usynyp, kórermenniń kózaıymyna aınalǵan teatr. 

Alǵashqy kúni óner ordasy kórermen nazaryna ómirdiń taýqymetin kórip, shyńyraýǵa túsken adamdardyń taǵdyry týraly baıandalǵan «Shyńyraý» spektaklin qoıdy. Spektaklde úmiti úzilgen adam, saǵy synǵan pendeler, adal joldan adasyp, ómirden baz keshken tulǵalar men olardyń jan aıqaıy sýretteledi. Mine, osy kórinister arqyly rejısser qazirgi qoǵamnyń aşy shyndyǵyn kórsetkisi kelgen.

«Óner jolynda júrip, halyqtyń yqylasyna bólengen akter, biri aqyn, biri bıshi, ánshi bolǵan pendelerdiń qasireti sýretteledi. Keıipkerlerdiń kóbi shyńyraýdyń túbine túskender. Mysaly, men somdaǵan akter kezinde Gamletti oınaǵan, tanymal bolǵan. Ónerin eshkim baǵalamaǵannan keıin iship, maskúnemdik jolǵa túsip ketken. Ol osy qıyndyǵynan arylǵysy keledi. Aıtqymyz kelgeni, qazirgi qoǵamda sátsizdikke ushyrap, dúnıe-múlkin satyp, otbasynan aıyrylǵan azamattar bar. Mine, solar ýaqytsha synaqty jeńe bilýi kerek»,-deıdi teatr ártisi  Erbol Ydyrysov.

Pesanyń qoıýshy rejısseri - Danııar Bazarqulov. Qoıylymda 15 akter oınaıdy. Ártister 4 aı daıyndalypty. Qoıylym birde monolog, birde dıalog retinde órbıdi. Spektakl osyǵan deıin biraz festıvalderge qatysyp, teatr maıtalmandarynyń joǵary baǵasyn alyp úlgergen. Teatr dırektory osy joly da myqty daıyndyqpen kelgenin aıtty.

«Respýblıkalyq festıvalderden júldeli oryndar alyp júrmiz. Bizdiń repertýarymyzdaǵy eń jaqsy spektaklderdiń biri.  Bizdiń teatr 17 qyrkúıekten bastap, gastroldik saparda júr. Myqty ártisterimiz Mańǵystaýǵa keledi. Lıdııa Kádenova sekildi tanymal aktrısa, akterlerimiz óner kórsetedi»,-deıdi teatr dırektory Sábıt Ábdihalyqov.

Ǵ.Músirepov atyndaǵy Qazaq memlekettik akademııalyq balalar men jasóspirimder teatry - shoqtyǵy bıik qoıylymdary jáne daryndy óner maıtalmandarymen birge mańǵystaýlyq kórermenmen qaýyshatyn sátti asyǵa kútedi.

Eske sala ketsek, 18, 19, 20 qyrkúıekte saǵat 11.00 jáne 13.00-de Elbasy Nursultan Nazarbaevtyń «Latyn álipbıine kóshý» bastamasyn qoldaý maqsatynda jańadan sahnalanǵan «Áripter álemine saıahat» ( avt. Á.Baıbol ) atty balalarǵa arnalǵan mýzykalyq-tanymdyq ertegisi, 18 qyrkúıekte «Men, umytylmaımyn...» ( avt. M.Maqataev ) lırıkalyq dramasy qoıylady.

Al 19 qyrkúıekte kórermender «Eneler men kelinder» ( avt. S.Balǵabaev ) komedııasyn, 22 qyrkúıekte «Kelinder kóterilisi» ( avt. S.Ahmad ) komedııasyn tamashalaıdy.

Sondaı-aq  Jańaózen qalasynyń turǵyndary 20, 21 qyrkúıek kúnderi qoıylymdardy «Munaıshy» mádenıet saraıynyń sahnasynan kóre alady.