Mańǵystaýda Esenǵalı Raýshanovtyń shyǵarmashylyq keshi ótti

ASTANA. QazAqparat - Ádebıet áleminde ózindik qoltańbasy bar qalamger-aqyn alashtyń bir týar azamaty Esenǵalı Raýshanov bıyl 60 jasta. «Kelintóbe», «Sholpan juldyz týǵansha», «Ǵaısha bıbi», «Qara baýyr qasqaldaq» atty birneshe kitaptyń avtory ári kóptegen qundy shyǵarmalarymen esimi elge tanys. Aqynnyń alpys jyldyq merekesi Mańǵystaý jerinde keńinen atalyp ótýde, dep habarlaıdy ákimniń baspasóz qyzmeti.

Elbasynyń «Bolashaqqa baǵdar: rýhanı jańǵyrý» baǵdarlamasy aıasynda ártúrli sharalar uıymdastyryldy. Atap aıtsaq, Nurmuhan Jantórın atyndaǵy oblystyq mýzykalyq-drama teatrynda «Bizdiń eldiń jylqysy kil kókmoınaq» atty shyǵarmashylyq keshi ótti. Sharaǵa aqynnyń úzeńgiles dostary, shákirtteri, stýdentter jáne myńdaǵan jyr súıer qaýym qatysty. Aqynǵa júrek jardy, aq tilegin aıtý úshin Tólen Ábdikuly, Qajyǵalı Muhambetqalıuly, Saraı Ánes Tólendiuly, Ámın Tuıaqov, Ábish Kekilbaevtyń jubaıy Klara Jumabaeva, Saýytbek Abdrahmanov syndy qoǵam qaıratkerleri keldi.



Merekelik keshte Mańǵystaý oblysynyń ákimi Eraly Toǵjanov óziniń quttyqtaý lebizin bildirip, rızashylyǵyn jetkizdi. Sondaı-aq ol: «Búgingi keshtiń orny aıryqsha qazaq ádebıeti úshin aıtýly kún. Patrıottyq jyrlaryńyzben egemendik alǵanǵa deıingi jyldardaǵy tynysyn taryltyp, ulttyq namysyna batqan qazaq halqynyń rýhyn asqaqtatyp, ulttyń birligin kúsheıtý jolynda qosqan eren eńbegińizdiń úlesi mol. Olaı bolsa, elimizdiń jetken jetistikteri men alǵan asýlary, tolaǵaı tabystary siz sekildi halqy úshin týǵan asyl uldarynyń arqasy. Rýhty jyrlaryńyz ǵumyrly bolýyn tileımin», - dedi, oblys ákimi.



Shyǵarmashylyq keshte kórermen nazaryna «Aısha Bıbi» teatrlandyrylǵan qoıylymy usynyldy. Kesh sońynda avtor kórermenge óz alǵysyn bildirdi. Sondaı-aq ol, «Elbasynyń  «Bolashaqqa baǵdar: rýhanı jańǵyrý» maqalasy el kútken eń úlken jańalyq boldy. Bul tusta aqyn-jazýshylarymyzdyń basty mindeti memleket basyshysy atap ótken tól tarıhymyzdy túgendep, babalar saltyn saqtap qalý. Básekege qabiletti, sanaly urpaq tárbıeleý», - dedi.

 

Sonymen qatar, Esenǵalı Ábdijapparuly qoǵam qaıratkeri retinde jergilikti jastarmen júzdesip, aǵalyq aqyl-keńisimen bólisti. Kezdesý barysynda memleket basshysy óz maqalasynda atap ótken «rýhy bıik, bilimdi urpaq bolý úshin árbir azamat zamana kóshinen qalmaı, ǵylym men tehnologııanyń tilin meńgerý kerek» ekenin erekshe atap ótti.