Mańǵystaýda eriktilerdiń «Úılestirý keńesi» quryldy

AQTAÝ. QazAqparat – Mańǵystaýda óńirdegi volonterlik toptar men qaıyrymdylyq uıymdardyń jetekshilerinen qurylǵan «Úılestirý keńesi» óz jumysyn bastamaq, dep habarlaıdy QazAqparat tilshisi.

Bul týraly keńeıtilgen otyrysta Mańǵystaý oblystyq ishki saıasat basqarmasynyń basshysy Erjan Kúmisqalıev aıtyp berdi.

Úılestirý keńesi – múddeles toptardyń basyn biriktirý, óńirdegi volonterlik qyzmet salasyndaǵy ortaq jumys josparyn qurý jáne júzege asýyna yqpal etý, máselelerdiń birlese sheshý joldaryn qarastyrý maqsatynda quryldy.

Jıynda aıtylǵandaı, volonterlik toptar men qaıyrymdylyq uıymdardyń kómegimen oblystaǵy turmysy tómen, múmkindigi shekteýli jáne t.b. kómekke zárý azamattardyń ortaq bazasy jasaqtalyp, olarmen tıimdi jumys júrgizýdiń biryńǵaı júıesin qalyptastyrý josparlanǵan.

Basqosýǵa 30-ǵa jýyq top pen uıym, 90-ǵa jýyq volonter qatysty.

Erkin pikir almasý formatynda ótken jıynda volonterlik top pen uıym ókilderi óńirdegi volonterlik qyzmet salasynda aqparattandyrý deńgeıiniń tómendigi men memlekettik mekemelermen tıimdi keri baılanys ornatý jolǵa qoıylmaǵandyǵy sóz etti.