Mańǵystaýda elektr qýatynyń tarıfi 17% tómendedi
AQTAÝ. QazAqparat - Mańǵystaý oblysynda qoldanystaǵy tarıfterdi tómendetý boıynsha naqty sharalar qabyldandy. Aǵymdaǵy jyldyń 1 qyrkúıeginen bastap Aqtaý qalasy boıynsha elektr tarıfi 26% tómendedi,-dep habarlaıdy QazAqparat tilshisi.
Elektr qýatyn berý tarıfiniń tómendeýi 187 myń adamdy qamtydy. Mańǵystaý oblysy ákimi baspasóz qyzmetiniń málimetinshe, aımaq basshysy Eraly Toǵjanov bul týraly Aqordada Elbasy Nursultan Nazarbaevtyń tóraǵalyǵymen ótken Qaýipsizdik Keńesiniń otyrysynda habarlap, óńirdegi kommýnaldyq qyzmetter tarıfteri týraly baıandady.
Aǵymdaǵy jyldyń 1 shildesinen bastap elektr energııasyn óndirý tarıfi 671,3 myń turǵyndy qamtýmen 8% tómendedi. Eki energııa berýshi kompanııanyń elektr energııasyn jetkizý shemasynan alyp tastaý arqyly Aqtaý qalasynyń qala mańy boıynsha tarıf 5 myń adamdy qamtı otyryp, 17% tómendedi. Nátıjesinde barlyq oblys boıynsha elektr energııasyna tarıftiń jalpy tómendeýi orta eseppen 17% qurady.
«Prokýratýra organdary «MREK» AQ úshin 8,4 mlrd. teńge somasyna eńbekaqy qory men qaryz syıaqysy shyǵyndary bóliginde elektr qýaty tarıfynyń negizsiz bekitilýi boıynsha oblystyq Monopolııaǵa qarsy departamentke qatysty talap aryz berdi (eńbekaqy tólemderi qory 1,9 mlrd. teńge jáne qaryz syıaqysy 6,5 mlrd.teńge). Talap qanaǵattandyrylǵan jaǵdaıda, oblystyń barlyq turǵyndary úshin tarıf 20-30% tómendeıdi. 2018 jylǵa 1 kVt/saǵ úshin 2,32 teńgeden 1,74 teńgege deıin; 2019 jylǵa 2,49 teńgeden 2,06 teńgege deıin; 2020 jylǵa 2,66 teńgeden 2,18 teńgege deıin», - dedi oblys ákimi Eraly Toǵjanov.
Budan basqa, Memleket basshysynyń tapsyrmasyna sáıkes barlyq shaǵyn Elektrjelilik kompanııalardy ońtaılandyrý boıynsha jumystar júrgizilýde. Bul elektr energııasynyń tarıfin ortasha eseppen 7% - ǵa 16,85 teńgeden 1 kVt/saǵ úshin 15,74 teńgege deıin tómendetýge múmkindik beredi.
Sondaı-aq, «MEBK» AQ Elektrjelilik kompanııasynyń aldyna 9,2 mlrd.teńge somasyna Elektrmen jabdyqtaýdyń jańa jelilerin salýdy esepke ala otyryp, ınvestıtsııalyq baǵdarlamany qabyldaý mindeti qoıyldy.
