Mańǵystaýda elektr qýatynyń baǵasy óspeıdi
Mańǵystaý oblysyndaǵy eki eldi mekendi toqpen jabdyqtaýǵa jeke kompanııa jaýapty. Seriktestik ókilderi osy jazdan bastap tarıfti kóterý týraly usynysyn ókiletti organǵa jazbasha túrde joldaǵan. Alaıda, óńirlik tabıǵı monopolııalardy retteý departamenti suranymdy keri qaıtaryp, keler kóktemge deıin tarıfti kótermeý týraly sheshim shyǵarǵan. Bir aı buryn oblys ortalyǵynda osy taqyrypta qoǵamdyq tyńdaý ótken edi. Jıynda eki eldi mekendi toqpen jabdyqtaýǵa mindetti jeke kompanııa elektr qýatynyń baǵasyn Munaıly aýdanynda 14 teńge 43 tıynnan 15 teńgege, al aqtaýlyqtar úshin 15 teńge 96 tıynnan 16 teńge 83 tıynǵa kóterýge nıetti jetkizgen.
«Bıyl 29 maýsymda energetıka mınıstrligi shyǵarǵan buıryqqa sáıkes elimizde tarıf ózgergeni málim. Osyǵan saı energııa kombınaty qoldanystaǵy baǵany 12 teńge 12 tıynnan 13 teńge 10 tıynǵa deıin kóterdi. Joǵarydaǵy suranymnyń týyndaýy da osy sebepti. Alaıda, seriktestik usynǵan qujattarǵa qatysty suraqtar boldy. Tarıftiń orynsyz kóterilýine jol bermeýge qatysty aıtylǵan Prezıdent tapsyrmasy bizdiń osy sheshimdi qabyldaýymyzǵa túrtki boldy», - dedi Tabıǵı monopolııalardy retteý komıteti aımaqtyq departamentiniń basshysy Jandos Sálimov.
Mańǵystaý oblysyndaǵy eldi mekenderdi tokpen jabdyqtaýǵa 7 mekeme jaýapty. Olar qalalyq energokombınat óndirgen elektr energııasyn tasymaldaýmen aınalysady.
