Mańǵystaýda elektr baǵanynyń mańynda oınap júrgen bala komaǵa túsip qaldy
ASTANA. QazAqparat - Mańǵystaý oblysy Munaıly aýdany Atameken aýylynda úıge qarsy bettegi elektr baǵanynyń mańynda oınap júrgen bala zardap shekken. Danııar úsh táýlik boıy komada jatqan. Oqıǵanyń mán-jaıyn arnaıy komıssııa anyqtaýda. Bul týraly «Mańǵystaý Energo» kompanııasy málim etti, dep habarlaıdy QazAqparat lada.kz saıtyna silteme jasap.
Búldirshin beton baǵannan shyǵyp turǵan temir arqaýdy ustaǵan sátte toq soqqan. Balanyń aıqaılaǵan daýsyn estip, 8 jasar Danııardyń ájesi kómekke kelgen. Ony da toq soqqan.
«Men kóshege júgirip shyqqanda, ulym es-tússiz jatty. Onyń janynda kórshi balalar turdy. Olar Danııardy osy baǵannan toq soqqanyn aıtyp berdi. Men oqıǵanyń qalaı bolǵanyn birden túsine qoımadym. Jerden ol ustaǵan temir shyǵyp turdy. Symdar da salbyrap turdy. Jaqyn mańda medbıke júrgen eken. Sol sátte onyń júrek soǵysy baıaýlaı bastaǵan. Ol júregine massaj jasap, jasandy tynys bergen. Keıin jedel járdem keldi», - dedi Danııardyń anasy.
Bala komaǵa túsip, 3 kún jansaqtaý bóliminde jatqan. Búgin ony shyǵardy, biraq balany bir aı boıy kardıolog, nevropatolog jáne psıholog tekseredi.
Sol keshte jumys toby kelip, birneshe saǵat boıy aqaýdy qalpyna keltirdi. Oqıǵanyń mán-jaıyn anyqtaý úshin arnaıy komıssııa qurylǵan.
«Shoǵyrsym tirektiń qamytyna qulap, ol qamytta elektr toǵy bolǵany anyqtaldy. Al, qamytqa jerlendirýshi sym bekitilgen. Arnaıy komıssııa quryldy. Ár qyzmetkerdiń áreketin egjeı-tegjeıli tekseremiz», - dep habarlady «Mańǵystaý Energo» MQK dırektorynyń mindetin atqarýshy Kómek Medelov.
