Mańǵystaýda eki mlrd teńge salyqtan jaltarǵan kásiporyndar anyqtaldy

NUR-SULTAN. QazAqparat - QR QM Qarjy monıtorıngi komıtetiniń Mańǵystaý oblysy boıynsha Ekonomıkalyq tergeý departamenti zańdy jáne jeke tulǵalar tobyna qatysty asa iri kólemde salyq tóleýden jaltarýdyń eki faktisi boıynsha sotqa deıingi tergeý isin aıaqtady, dep habarlaıdy QazAqparat atalǵan vedomstvonyń baspasóz qyzmetine silteme jasap.

Birinshi jaǵdaıda «SpetsKomýnStroı KZ» JShS 2014-2018 jyldar aralyǵynda seriktestiktiń shyǵys bóligin jabý úshin jalǵan jetkizýshilerden - «Rınat Aktaý» JShS, «Borı Aktaý» JShS jumystardy oryndamaı, qyzmetterdi kórsetpeı jáne taýarlardy jetkizbeı shot-faktýralardy alǵan. Bul rette, Mańǵystaý oblysynyń MAES sheshimimen atalǵan kásiporyndar arasyndaǵy mámileler zańsyz dep tanyldy.

Qujattyq salyq tekserisiniń aktisine sáıkes «SpetsKomýnStroı KZ» JShS jaltarǵan soma 163 mln. teńgeden asty. Munaıly aýdandyq sotynyń úkimimen kásiporyn basshysy QR QK 245-b. 2-b. 1-t. boıynsha aıypty dep tanylyp, oǵan bir jylǵa bas bostantyǵyn shekteý jazasy taǵaıyndaldy.

Ekinshi derek boıynsha basqa kásiporynnyń basshysy 2013-2017 jyldar aralyǵynda dál solaı seriktestiktiń shyǵys bóligin jabý úshin jalǵan tulǵaǵa tirkelgen jalǵan jetkizýshiden 5 mıllıard teńge somasyna jalǵan shot-faktýralardy alǵany anyqtaldy. ıAǵnı, kásiporyn 2 mıllıard 225 mıllıon teńge somasyna salyq tóleýden jaltarǵan. Aqtaý qalasynyń mamandandyrylǵan tergeý sotynyń sanktsııasy boıynsha is fıgýranttarynyń biriniń jyljylmaıtyn múlkine 2 mıllıardan astam teńge somasyna tyıym salyndy.

Qazirgi tańda QR QK 245-b. 3-t. boıynsha qylmystyq is Jańaózen qalalyq sotynda qarastyrylý kezeńinde.