Mańǵystaýda eki kompanııa 4,6 mlrd teńgeniń jalǵan býhgalterlik qujattaryn jasaǵan
«Qolma-qol aqshaǵa aınaldyratyn» kompanııalar taýarlardy satpaıdy jáne qyzmet kórsetpeıdi, biraq qarajatty qolma-qol aqshaǵa aınaldyryp, basqa fırmalarǵa aqshalaı syıaqyǵa jalǵan qujattar jasaıdy.
Bul zańsyz áreketterdi jasaǵany úshin QR QK 216-baby boıynsha qylmystyq jaýapkershilik júktelip, 7 jyl merzimge bas bostandyǵynan aıyrý jazasy qarastyrylǵan», delingen habarlamada.
Agenttiktiń Mańǵystaý oblysy boıynsha aýmaqtyq departamenti materıaldyq syıaqy úshin jalǵan shot-faktýralardy jazyp berýdiń eki deregin anyqtaǵan.
«Birinshi jaǵdaıda kásipker Á.Qosbarmaqov Jańaózen qalasynda «Ózen-Aqjol» JShS jáne «Qosbarmaqov Ádilet Amankeldiuly» JK atty eki kompanııa qurdy. Júk tasymaly jáne qyzmet kórsetý boıynsha negizgi qyzmettiń ornyna eki kásiporyn atynan 3,1 mıllıard teńgeden astam somaǵa 7 kompanııaǵa jalǵan býhgalterlik qujattardy jazyp berý júzege asyrylǵan», dep málimdedi vedomstvodan.
Osyǵan uqsas derek Aqtaý qalasynda da anyqtalǵan.
«I.Agataev pen M. Ábilev «Bóri Aqtaý» JShS-yn quryp, bir top tulǵalarmen aldyn ala sóz baılasý arqyly is júzinde jumystar oryndamaı jáne qyzmetter kórsetpeı, 1,5 mıllıard teńgeden astam somaǵa shot-faktýralar jazyp bergen», delingen habarlamada.
Osy kompanııalardyń zańǵa qaıshy áreketiniń nátıjesinde memleketke tólenbegen salyq túrinde 767 mıllıon teńgeden astam zalal keltirilgen. Agenttiktiń málimdeýinshe, barlyq kináli adamdar ártúrli merzimge sottalǵan.