Mańǵystaýda eki qolynan aıyrylǵan balaǵa páter berildi
Oblys ákiminiń baspasóz qyzmetiniń málimetinshe, Balǵynbektiń januıasynda barlyǵy 8 bala bar. Olar osyǵan deıin Beıneý aýdanynda apattyq úıde turǵan. Kóp balaly otbasynda jýyrda ǵana úshem dúnıege keldi.
Balǵynbektiń em alýy úshin ákesi Balǵazy Serikbaev Aqtaý qalasyna páter jaldap, ýaqytsha turýǵa májbúr bolǵan. Sondyqtan ol búgin aımaq basshysyna rızashylyǵyn jetkizdi. Ol balasynyń jaǵdaıyn aıtyp, oblys ákiminiń jeke qabyldaýyna 2 aı buryn kirgen eken. Al Eraly Toǵjanov barlyq kómektiń jasalatynyn aıtqan. Búgin tilegi oryndalǵan áke kóz jasyna erik berdi. Endi Balǵynbektiń tezirek jasandy qol salyp, qatarǵa qosylýyn qalaıtyn ol qarajat jınaýǵa kómektesken halyqqa da alǵysyn aıtty. Olardyń qýanyshymen bólisip, quttyqtaýǵa arnaıy Olımpıada júldegeri Ádilbek Nııazymbetov te keldi.
Eske sala keteıik, bul qaıǵyly oqıǵa osydan eki jyl buryn Beıneý aýdanynda oryn alǵan bolatyn. Aýyldaǵy transformatrdyń aınalasynda oınap júrgen 11 jasar Balǵynbek toqqa túsip, eki qolynan aıyryldy. Aýyr jaraqattyń saldarynan dárigerler jaramsyz bolyp qalǵan eki qolyn kesip tastaýǵa májbúr boldy.
«Balǵynbektiń ata-anasy men týystary ulynyń qolyna protez salýǵa qol ushyn sozýǵa qaıyrymdy jandardan kómek surap, emine qajetti qarajat jınady. 2018 jyldyń qańtar aıynda reseılik dárigerler Balǵynbekke jasandy qol ornatpaq. Endi qatarǵa qosylyp, óz qajettiligin ózi jasaı alatyndaı dárejege jetse, oqýyn Aqtaýda jalǵastyrady»,- delingen habarlamada.