Mańǵystaýda eki kólik soqtyǵysyp, er adam qaıtys boldy
ASTANA. QazAqparat - Aqtaý-Jetibaı trassasynyń boıynda eki kólik soqtyǵysyp, ekeýi de órtendi. Sonyń saldarynan er azamat qaıtys boldy, dep habarlady Lada.kz.
Jol apaty 6 jeltoqsan kúni keshki 20-00-der shamasynda Aqtaý-Jetibaı trassasynyń boıynda boldy.
Kýágerlerdiń sózinshe, janarmaı beketinen shyqqan krossover qarsy jolaqqa shyǵyp ketip, júk kóligimen soqtyǵysty. Órt sóndirýshiler oqıǵa ornyna jetkenshe, eki kólik te túgel órtenip ketken.
Apat medıtsınasy ortalyǵynyń Mańǵystaý oblysy boıynsha fılıalynyń mamandary taratqan málimetterge qaraǵanda, Renault Duster kóliginiń júrgizýshisi oqıǵa ornynda qaıtys bolǵan. Ekinshi kóliktiń júrgizýshisi aman jáne ol medıtsınalyq kómekti qajet etpedi.
Mańǵystaý oblystyq tótenshe jaǵdaılar qyzmetiniń habarlaýynsha, Aqtaý-Jetibaı trassasynyń boıyndaǵy jol apatynyń mán jaıyn jol polıtsııasynyń qyzmetkerleri anyqtap jatyr.
