Mańǵystaýda densaýlyq saqtaý basqarmasynyń burynǵy basshysy bosatyldy
AQTAÝ. QazAqparat - Oblystyq densaýlyq saqtaý basqarmasynyń burynǵy basshysy Maral Qadyr bosatyldy. Sot onyń jazasyn óteý merzimin qyzy kámelettik jasqa tolǵanǵa deıin shegerý týraly ótinishti qarady, dep habarlaıdy «QazAqparat» HAA tilshisi.
Bul aqparatty tilshimizge Mańǵystaý oblystyq soty málimdedi.
«Shyn mánisinde qalalyq sotta onyń bosatý týraly ótinishi qaraldy, ol jazasyn óteý merzimin qyzy kámelettik jasqa tolǵansha keıinge qaldyrýdy suraǵan. Qyzy qazir 17 jasta. Demek, jaza merzimi shamamen jarty jylǵa keıinge shegeriledi», - dedi sot qyzmetkerleri.
Aıta keteıik, Maral Qadyr - Mańǵystaý oblysy densaýlyq saqtaý basqarmasynyń burynǵy basshysy. Sotta onyń óziniń qolastyndaǵylardan aqsha bopsalaǵandyǵy týraly 4 oqıǵa dáleldendi, 5 mamyr kúni Atyraý qalalyq soty oǵan múlkin tárkileı otyryp, 7 jylǵa bas bostandyǵynan aıyrý jazasyn kesti.
Aıyptalýshynyń kámeletke tolmaǵan qyzy bolǵandyqtan, sot úkimi jeńildetetin mán-jaılar esebimen shyǵaryldy. 14 shilde kúni sot alqasynda Mańǵystaý oblystyq sotynyń úkimine ózgeris engizilip, oǵan 5 jylǵa bas bostandyǵynan aıyrý jazasy taǵaıyndaldy. Ol aıyptaýdyń barlyq tarmaqtary boıynsha kináli dep tanyldy. Qylmystyq jazalaý men jeke múlkin tárkileýden basqa sottalýshy ómir boıy belgilengen qyzmetterdi atqarý quqyǵynan aıyryldy.
