Mańǵystaýda dárigerler bas súıegi shytynap ketken balany aman alyp qaldy
AQTAÝ. QazAqparat - Mańǵystaýlyq dárigerler bas súıegi shytynap ketken balanyń ómirin saqtap qaldy, - dep xabarlaıdy QazAqparat tilshisi.
Jańaózen qalalyq aýrýxanasyna 31 naýryz kúni keshki saǵat 17:10 shamasynda 1 jasar bala kelip túsken. Oǵan bas súıek-mı aýyr jaraqaty, mı sol jaq bóliginiń gematomasy, gemıparez, 1-2 dárejeli koma t.b aýyr dıagnozdar qoıylǵan.
Jańaózen qalasyna dereý oblystyq aýrýxanadan neıroxırýrg Erbol Kenjalov attanady. Ol balanyń basyn tigip, zaqymdalǵan bólikterin biriktiredi. Osylaısha, 2 saǵatqa jýyq ota jasaıdy.
MO Densaýlyq saqtaý basqarmasy baspasóz qyzmetiniń xabarlaýynsha, qazir balanyń jaǵdaıy qalypty aýyr.
Ata-anasynyń aıtýynsha, bala 2-qabattan qulap ketken.
