Mańǵystaýda dárigerler balanyń saýsaǵyna keptelip qalǵan boltty kesip aldy
AQTAÝ. QazAqparat - Mańǵystaý oblysynda bala oınap júrip saýsaǵyn boltqa suqqan. Keptelip qalǵan burandany alyp tastaýǵa qutqarýshylar men dárigerler kómekke keldi. Bul jaıly Mańǵystaý oblysy Densaýlyq saqtaý basqarmasynyń baspasóz hatshysy Azamat Sársenbaev Facebook-tegi paraqshasynda jazdy, dep habarlaıdy QazAqparat.
«12 maýsymda shamamen saǵat 20:30-da oblystyq Balalar aýrýhanasyna boltqa saýsaǵy keptelip qalǵan balanyń ata-anasy habarlasty. Dárigerler qutqarýshylarmen birlesip, bir saǵat boıy balanyń qolyndaǵy temir boltty kesýmen aınalysty. Aralaý kezinde temir qyzyp ketkendikten bala aýyrsyndy. Sol sebepti dárigerlerdiń narkoz qoldanýyna týra keldi. Bári sátti aıaqtalyp, balanyń qolyndaǵy bolt alyndy. Qazirgi ýaqytta balanyń jaǵdaıy jaqsy, qajetti emin alyp jatyr», - dep habarlady baspasóz hatshysy.
Ata-anasynyń aıtýynsha, úıdegi jóndeý jumystary kezinde bala baıqamaı boltty saýsaǵyna kıip alǵan.
