Mańǵystaýda brakonerlikke qatysty istiń 11 paıyzy ǵana sotqa jiberilgen
AQTAÝ. QazAqparat - Mańǵystaý oblysynda sońǵy tórt jylda brakonerlikke qatysty tirkelgen qylmystyq isterdiń 11,3% ǵana sotqa jiberilgen. Qalǵandary ashylmaǵan, dep habarlaıdy QazAqparat oblystyq prokýratýranyń baspasóz qyzmetine silteme jasap.
Mańǵystaý oblysynyń prokýratýrasynda brakonerlikpen, onyń ishinde bekire tuqymdas balyqpen kúresti júzege asyratyn ýákiletti organdar jumysynyń tıimdiligi máselesi boıynsha zańdylyqty, quqyqtyq tártipti jáne qylmysqa qarsy kúresti qamtamasyz etý jónindegi úılestirý keńesiniń otyrysy ótti.
Jıynda brakonerlikpen kúreske baǵyttalǵan organdardyń tıisti ózara is-qımylynyń joqtyǵyna jáne olardyń materıaldyq-tehnıkalyq jaraqtalýyna, osy sanattaǵy qylmystardyń tómen ashylýyna nazar aýdaryldy.
Oblystyq prokýratýranyń málimetinshe. 2014 jyldan bastap qazirgi ýaqytqa deıin óńirde brakonerlikke qatysty 151 qylmystyq is tirkelip, sotqa tek 17 nemese 11,3% jiberilgen. Qalǵan 134-i ashylmaǵan. Osy kezeńde bekire etin zańsyz tasymaldaý jáne saqtaý faktileri boıynsha 221 is qozǵalyp, sotqa 198 qylmystyq is jiberildi, qalǵan 23-ne tergeý merzimi toqtatyldy.
Zańsyz aınalymnan 23,4 tonna balyq tárkilendi. Memleketke keltirilgen shyǵyn 1,3 mlrd teńge boldy.
«Sonymen qatar, sotqa ýaqtyly júginbeý nátıjesinde 17,3 mln teńgege buryn alynǵan zattaı dáleldemeler (balyq jáne ýyldyryq) satylmaǵan. Tárkilengen balyqty ýákiletti emes sýbektige tapsyrý jáne odan ári ótkizý boıynsha zańsyz tájirıbe anyqtaldy», - delingen habarlamada.
Aıta keterligi, zańnamada balyqtardy memlekettik kásiporyndardyń ǵana satý tártibi kózdelgen. Osyǵan qaramastan, oblystyq Polıtsııa departamenti jeke kásipkerlermen kelisimshart jasasqan.
