Mańǵystaýda brakonerlerden 150 keli bekire tárkilendi

AQTAÝ. QazAqparat – Mańǵystaý oblysynda brakonerlerden 150 keli bekire tárkilendi, dep habarlaıdy QazAqparat Polisia.kz saıtyna silteme jasap.

Brakonerlikti, bıologııalyq resýrstar obektileriniń zańsyz aınalymyn anyqtaý jáne jolyn kesý maqsatynda óńirde 24 aqpan men 13 naýryz aralyǵynda respýblıkalyq «Brakoner» jedel-aldyn alý is-sharasy ótkizilip jatyr.

1 naýryz kúni saǵat 00:20 shamasynda respýblıkalyq mańyzy bar Fort- Shevchenko - Aqtaý tasjolynyń 89/43 shaqyrymynda Mańǵystaý oblysy PD patrýldik polıtsııa rotasy, Mańǵystaý oblysy PD tabıǵatty qorǵaý polıtsııasy oblystyq balyq ınspektsııasy jáne UQK Mańǵystaý oblysy boıynsha departamenti qyzmetkerlerimen birlesip, Ford mondeo avtokóligi toqtatyldy. Avtokólikti tekserý barysynda júk salǵysh bóliginen salmaǵy 150,35 keli bolatyn zańsyz aýlanǵan 57 dana bekire tuqymdas balyq anyqtaldy. Atalǵan derek QR QK-niń 339-baby (Ósimdikterdiń nemese janýarlardyń sırek kezdesetin jáne quryp ketý qaýpi tóngen, sondaı-aq paıdalanýǵa tyıym salynǵan túrlerimen, olardyń bólikterimen nemese derıvattarymen zańsyz aınalysý) boıynsha Túpqaraǵan aýdany polıtsııa bóliminiń sotqa deıingi tergep-tekserýdiń biryńǵaı tiziliminde tirkeldi.

Polıtseıler 35 jáne 39 jastaǵy kúdikti azamattardy ustady. Tárkilengen balyq «Kazakh Osseter» JShS mekemesine jiberildi. Ózge aqparat tergeý múddesi úshin jarııa etilmeıdi.