Mańǵystaýda brakonerler bıýdjetke 1,3 mlrd teńge zalal keltirgen
Mańǵystaý oblystyq prokýratýrasynda brakonerlikpen kúresetin ýákiletti organdar jumysynyń tıimdiligi máselesi boıynsha zańdylyqty, quqyqtyq tártipti jáne qylmysqa qarsy kúresti qamtamasyz etý jónindegi úılestirý keńesiniń otyrysy ótti.
Mańǵystaý oblystyq prokýrorynyń orynbasary Erjan Turmaǵambetov brakonerlikpen kúreske baǵyttalǵan organdardyń ózara is-qımylynyń joqtyǵyn aıtyp, saldarynan qylmystardyń az ashylatynyna nazar aýdardy. Ol saladaǵy salǵyrttyqty atap ótti.
«2014 jyldan bastap búginge deıin brakonerlik faktileri boıynsha 151 qylmystyq is tirkelip, sotqa sonyń tek 17-si, ıaǵnı 11,3% jetti. Qalǵan 134 qylmys ashylmady. Sotqa ýaqtyly júginbeý saldarynan 17,3 mln teńgege buryn alynǵan zattaı dáleldemeler (balyq jáne ýyldyryq) satylmaǵan. Alynǵan balyqty ýákiletti emes sýbektige tapsyrý jáne odan ári ótkizý boıynsha zańsyzdyqtar anyqtalǵan»,-dedi Erjan Turmaǵambetov.
Zańsyz aınalymnan 23,4 tonna balyq tárkilengen. Kelgen zalal 1,3 mlrd teńgeni qurady. Osy kezeńde bekire etin zańsyz tasymaldaý jáne saqtaý faktileri boıynsha 221 is qozǵalyp, sotqa 198 qylmystyq is jiberildi. Qalǵan 23-ine tergeý merzimi toqtatylǵan.
«Zań boıynsha balyqtardy memlekettik kásiporyndar ǵana sata alady. Osyǵan qaramastan, oblystyq polıtsııa departamenti jeke kásipkerlermen kelisimshart jasasqan»,-deıdi Mańǵystaý oblysy prokýrorynyń orynbasary Erjan Turmaǵambetov.
Otyrysta osyǵan qatysty usynystar berildi. Sondaı-aq, brakonerlikpen kúreske baǵyttalǵan qyzmettiń materıaldyq-tehnıkalyq jaraqtalýy jaıynda da aıtyldy.