Mańǵystaýda «Bolashaq» shekara beketi ashyldy

ASTANA. QazAqparat - Mańǵystaýda Táýelsizdik kúni qarsańynda Qazaqstan-Túrikmenstan shekara shebinde QR UQK ShQ Jaǵalaý kúzeti óńirlik basqarmasy 2018 áskerı bóliminiń «Bolashaq» shekara beketi saltanatty túrde  ashyldy.

Bul týraly óńirlik ákimdiktiń baspasóz qyzmeti habarlaıdy.

2018 áskerı bóliminiń jeke quramy Qazaqstan Respýblıkasynyń tranzıttik aımaǵy bolyp tabylatyn Qazaqstan-Túrikmenstan baǵytyndaǵy Memlekettik shekarany senimmen kúzetip keledi. Osyǵan deıin shekara zastavasynyń kúndelikti qyzmettik - jaýyngerlik is-áreketteri jyljymaly modýl tıpterinde uıymdastyrylyp kelgen bolatyn. Endi áskerı quram jańa bekette Otan aldyndaǵy paryzyn oryndaı alady.

 

Ashylý saltanatyna arnaıy barǵan oblystyq máslıhat hatshysy Serikbaı Turymov Qazaqstan shekarashylarynyń halyq pen eldiń múddesine rııasyz qyzmet etetindigine, áskerı antqa jáne qyzmettik paryzǵa adal bolatyndyǵyna senim bildirdi.