Mańǵystaýda bolashaq dárigerlerdi daıarlaýǵa kóp grant bólinýde
Oblystyq bilim basqarmasynyń málimetinshe, jyl saıyn Mańǵystaý oblysynda basym mamandyqtar boıynsha arnaýly daıyndyqqa jergilikti bıýdjetten bilim granty bólinip, konkýrstyq negizde taǵaıyndalady.
Bul granttyń basym bóligi halyqtyń áleýmettik osal tobynan shyqqan túlekterge beriledi.
Bıylǵy oqý jylynda jergilikti bıýdjetten elimizdiń 18 ýnıversıtetinde bilim alýǵa 175 grant bólindi.
Kelesi oqý jylynda qandaı baǵyttar boıynsha granttar bólinetini týraly 2023 jyldyń kókteminde ótetin konkýrstyq komıssııanyń otyrysynda oblystyń sala basqarmalarynyń suranysy negizinde sheshiledi.
Jergilikti bıýdjetten bólingen bilim grantyn taǵaıyndaý konkýrsyna qatysý úshin túlekter oblystyq bilim basqarmasynda qurylǵan qabyldaý komıssııasyna ótinim tapsyrady.
Grantty taǵaıyndaý boıynsha sheshimdi ákimshilik janyndaǵy arnaıy komıssııa qabyldaıdy. Elimizdegi joǵary oqý oryndaryna qabyldaý 25 tamyzǵa deıin júrgiziledi.
Ótken oqý jylynda Mańǵystaýda 175 túlek jergilikti bıýdjettiń esebinen JOO-ǵa tústi.
2018 jyldan beri 600 stýdent elimizdegi mańdaıaldy ýnıversıtetterde kásibı bilim alyp júr. Keıin olar oqýyn támamdaǵan soń Mańǵystaý aımaǵynda qyzmet etetin bolady.
Aımaqtaǵy densaýlyq saqtaý salasyndaǵy kadr tapshylyǵy eskerilip, 2022 jyly oblys ákimi grantynyń 85,7 paıyzy «jalpy medıtsına» mamandyǵyna bólindi.
Atap óter bolsaq, 2018 jyly - 150 bakalavrıat, 25 magıstratýraǵa, 2019 jyly - 165 bakalavrıat, 10 magıstratýraǵa, 2020 jyly - 170 bakalavrıat, 5 magıstratýraǵa, 2021 jyly - 165 bakalavrıat, 10 magıstratýraǵa jáne 2022 jyly – 175 bakalavrıatqa grant bólindi.
Foto: Mańǵystaý oblysy ákimdigi
