Mańǵystaýda bıyl 9 jańa mektep paıdalanýǵa beriledi
«Aǵymdaǵy jyly 6300 oryndyq 9 jańa mektep paıdalanýǵa beriledi. Sonymen qatar, 920 oryndyq 10 balabaqsha ashylsa, jyl sońyna deıin taǵy 23 bóbekjaı iske qosylady. Osylaısha jyl aıaǵyna deıin balabaqshamen qamtý kórsetkishin 100%-ǵa jetkizý kún tártibinde tur», - dedi óńir basshysy.
Densaýlyq salasyndaǵy keleńsizdikterge jol bermeý maqsatynda medıtsına mekemeleri jelisin keńeıtý boıynsha birqatar jumystar júrgizilýde. 23 medıtsınalyq uıymǵa adam densaýlyǵyndaǵy akaýlardy erte merzimde anyqtaýdy qamtamasyz etetin quny 1 mlrd teńgelik 16 zamanaýı ÝZI apparaty satyp alynady. Oblys ortalyǵyndaǵy Ana men bala óńirlik Ortalyǵynyń qurylysy aıaqtalady.
Elbasy bıylǵy «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» atty joldaýynda ekonomıkanyń barlyq salasynda tsıfrlyq tehnologııalardy aýqymdy túrde engizýdi atap kórsetti. «Qazaqtelekom» kompanııasynyń qoldaýymen oblystyń kóptegen eldi mekenderi ınternet jelisimen tolyqtaı qamtylyp, onyń jyldamdyǵy arttyryldy. Bilim berý uıymdarynda «Egov.kz» portaly arqyly «Balabaqshaǵa kezekke qoıý», «Oqýshylardy mektepke qabyldaý», «Elektrondy jýrnal», «Elektrondyq kolledj» avtomattandyrylǵan júıesi tolyq engizilgen. Mektepter tolyǵymen mektep.edu.kz aqparattyq júıesine qosylǵan. Aqparattyq júıeniń pedagogtarǵa jáne ata-analarǵa arnalǵan mobıldik qosymshalary jumys jasaıdy.
Tsıfrlandyrý salasyn júıeli qolǵa alýdyń nátıjesinde eńbek ónimdiligi 30%-ǵa artyp, qyzmet kórsetý ýaqyty 5 saǵattan 15 mınýtqa deıin qysqardy. Oblystaǵy 90 densaýlyq saqtaý nysany keń jolaqty ınternetke qosyldy. «Damumed» keshendi medıtsınalyq aqparattyq júıesi engizildi. Nátıjesinde eńbek ónimdiligi 50%-ǵa artyp, halyqtyń 91%-nyń elektrondy densaýlyq pasporty jasaldy. Aǵymdaǵy jyldyń qańtar aıynda oblysta Elektrondy eńbek bırjasy quryldy. Jyl basynan beri Eńbek bırjasyna 4 myńnan astam azamat tirkeldi.
«Jasyl ekonomıka» elementterin engizý boıynsha oblysta birqatar jumystar atqaryldy. Bul oraıda, jeke ınvestor qarjysyna Munaıly aýdanynyń Batyr aýylynda qýaty 2 MVt kún elektr stantsııasynyń qurylysy aıaqtalyp, paıdalanýǵa berilgenin atap ótý qajet. Osy ınvestordyń qatysýymen Túpqaraǵan aýdanynyń Aqshuqyr aýylynda qýaty 5 MVt jel elektr stantsııasy paıdalanýǵa beriledi.
Sonymen qatar, Túpqaraǵan aýdanynda ınvestıtsııalyq quny 60 mln AQSh dollaryn quraıtyn qýaty 42 MVt taǵy bir jel elektr stantsııasy salynatyn boldy. Jobada árqaısysy 2,5 MVt bolatyn 17 jel generatoryn qondyrý qarastyrylǵan. Qurylys jumystary tamyz aıynda bastalady.