Mańǵystaýda bıyl 21 myń búldirshin alǵash mektep tabaldyryǵyn attamaq
Oqýshyny 1-synypqa qabyldaýǵa ótinishti halyqqa qyzmet kórsetý ortalyǵynda nemese mektepterdegi ózine-ózi qyzmet kórsetý buryshtaryna baryp berýge bolady.
«2022-23 oqý jylynda 20 108 bala 1-synypqa qabyldandy. Byltyr ata-analardyń 80 paıyzy onlaın-ótinish bergen bolatyn. Bıyl da egov.kz portalynda tıisti qujattardy joldaý qyzmeti jumys istep tur. Ol úshin bilim berý uıymyn aldyn-ala aıqyndap, tizimge sáıkes talap etilgen qujattardy tirkeý kerek. Atap aıtqanda, balanyń týý týraly kýáliginiń kóshirmesi, 026/ý-3 nysanyndaǵy densaýlyq pasporty, densaýlyq jaǵdaıy týraly 063/ý qujaty jáne eki dana 3h4 fotosýret qajet», - dep atap ótti Mańǵystaý oblystyq bilim basqarmasynyń bólim basshysy Klara Qulataeva.
Al gımnazııa men lıtseıge qabyldaný úshin oqýshylar arnaıy emtıhannan ótedi.
«1-synyp oqýshylary lıtseı men gımnazııaǵa qabyldaný úshin 15 maýsymǵa deıin arnaıy emtıhan tapsyrady. Testileý kúni men nysandaryn jáne tapsyrmalaryn gımnazııa, lıtseı mekemeleri ózderi anyqtap, belgileıdi. Balalar tıisti emtıhandy tapsyrǵannan keıin 16 maýsymnan bastap 1 tamyzǵa deıin bilim berý uıymdaryna ótinishterin joldaı alady, - dedi Klara Qulataeva.