Mańǵystaýda «Biryńǵaı áleýmettik tereze» jumys isteı bastady

AQTAÝ. QazAqparat - «Nur Otan» partııasynyń Mańǵystaý oblystyq fılıaly men Mańǵystaý oblysynyń ákimdigi Elbasy Nursultan Nazarbaevtyń tapsyrmasyna sáıkes, «Halyqqa kómek» jobasyn iske asyrýǵa kirisip ketti, dep habarlaıdy oblys ákimdiginiń baspasóz qyzmeti.

Baspasóz málimetterine qaraǵanda, atalǵan áleýmettik ortalyqtyń basty maqsaty - turǵyndarǵa járdemaqy, jumysqa ornalasý, turǵyn úı kezegine turý, bıznes-jobalardy qoldaý boıynsha quqyqtyq jáne konsýltatsııalyq kómek kórsetý.

«Biryńǵaı áleýmettik tereze» ortalyǵy Aqtaý qalasy, 35 shaǵyn aýdanyndaǵy «Atameken» oblystyq kásipkerler palatasy ǵımaratynda ornalasqan. Onda oblystyq jumyspen qamtý jáne áleýmettik baǵdarlamalar, densaýlyq saqtaý, qurylys, bilim berý, kásipkerlik jáne saýda, jolaýshylar kóligi jáne avtomobıl joldary basqarmasynyń mamandary azamattarǵa konsýltatsııalyq kómek kórsetip, suraqtaryna jaýap beredi. Eń bastysy kópbalaly, áleýmettik jaǵdaıy tómen jáne múgedek balalary bar otbasylardyń ótinishterine jedel túrde áreket etip, olarǵa memlekettiń qoldaý sharalaryn túsindirý jáne járdemdesý talaby qoıylǵan.

Jaýapty mamandar óz jumysyn bastaǵan bir aptada ortalyqqa 544 azamat kelgen. Onyń 81-i jumysqa ornalasý, 139-y baspana, 93-i materıaldyq kómek, 110-y járdemaqy boıynsha kelgen. Sondaı-aq alıment boıynsha - 63, sottyń sheshimi boıynsha - 17, kvota boıynsha - 8, dári-dármek boıynsha 27 adam habarlasqan. Sonymen qatar «Atameken» aımaqtyq kásipkerler palatasy arqyly barlyq zańdy jáne býhgalterlik suraqtar boıynsha bıznes-josparlar, memlekettik satyp alýlar jáne jobalardy qoldaý máseleleri boıynsha bastaýshy kásipkerlerge keńes berilip jatyr.

«Biryńǵaı áleýmettik tereze» ortalyǵynyń jumysy 9-dan 18.30-ǵa deıin, túski úzilis 12.30-dan 14 saǵatqa deıin jalǵasady.

Meken-jaıy: Aqtaý qalasy, 35-shaǵyn aýdan, «Atameken» kásipkerler palatasynyń ǵımaraty.