Mańǵystaýda birneshe eldi mekenniń qum kóshkininiń astynda qalý qaýpi bar
«Qum meniń bala kezimde, shamamen 60 jyldaı buryn, aýyldan 300 metrdeı jerde edi. 1996 jyldan bastap qum kóship bastady, sońǵy kezde údeı tústi. Qora, qudyq degenderdi basyp qaldy. Endi osy qumdy toqtatý kerek. Qorshaý ornatatyn bolsa, shóp óser edi», - deıdi Jarma aýylynyń turǵyny Igilik Ótesinov.
Tabıǵı apattan zardap shegip otyrǵan Jarma aýylynda 100-ge jýyq turǵyn bar. Olar jyl saıyn arnaıy tehnıka jaldap, aýlalaryn qumnan arshyp, alysqa tasytady. Biraq oǵan turǵylyqty halyqtyń báriniń birdeı jaǵdaıy jetpeıdi. Sondyqtan jaýaptylardyń tezirek sekseýil egip, qum kóshkinine toıtarys berýin suraıdy. Osy jaǵdaı Saýysqan, Sazdy eldi mekenderinde de oryn alyp otyr.
«Jyl basynan bastap biz tórt ret konkýrs jarııalaǵan bolatynbyz. Ókinishke qaraı, merdigerler konkýrsqa qatyspady. Bir apta buryn biz besinshi ret konkýrs jarııaladyq. 2004 jyldan beri sekseýil egý jumysyn júrgizip kele jatyrmyz. Qazirgi ýaqytqa deıin Senek, Tuşyqudyq, Shebir jáne Ushtaǵan aýyldaryna 3236 gektar sekseýil ektik, - dedi Mańǵystaý oblystyq tabıǵı resýrstar basqarmasynyń bólim basshysy Erbol Denov.
Memlekettik satyp alý konkýrsy qaıta jarııalanǵan. Eger baıqaýda merdiger anyqtalsa, jyl sońyna deıin úsh eldi mekende – Saýysqan, Sazdy, Jarmada 135 gektar aýmaq qorshalyp, keler jyly sekseýil egý jumysy bastalady. Jalpy osy jumystarǵa 6 jylǵa 408 mıllıon teńge qarajat qarastyrylǵan.
